Chakma-te'n Mizo kut an thlâk duh loin Aizawlah zirlaite'n kawng an zawh

Chakma ṭhalai ṭhenkhatte'n September 28, Ningania Chawngte-a Mizo Students Union (MSU) hruaitu ṭhenkhat kut an thlak duh loh lantir nan, Mizo Students Union (MSU) general headquarters leh Aizawl City College Joint Students Union (ACCJSU) chuan nimin khan Vanapa Hall kawt aṭangin Hunthar Venga Chakma House chhak thleng kawng an zawh.

Chakma ṭhalaite'n MSU hruaitute kut an thlak duh loh lantirna kawng zawhah hian zirlai ṭhahnem tak telin, buaina leh harsatna lian tham a thleng lo.

Kawngzawh hmain Aizawl DC ngenna angin Aizawl DC pisaah bawrhsap A Ma­thumma-i hoin MSU leh ACCJSU hruai­tute leh police hotute an ṭhukhawm a; sorkar hotute'n an ngen angin, kawng zawhtu zirlaite chu Chakma House thleng kal loin, a chhak deuhah an tawp a ni.

MSU president RB Lalmalsawma chuan, Chakma-te chu an haw ngawt lo tih a sawi rualin, Mizote bei zawnga an awm reng chuan an en liam mai mai dawn lo tih a sawi a, "Bangladesh aṭanga dan loa lo lut Chakma-te hi an lo luh loh nana venpui turin kum 1950 hma lama Mizorama lo awm tawh Chakma-te kan phût a ni," a ti.

MSU hian Chakma House-a mikhual thleng mek, damlo tih loh chu chhuak turin an phût a, magistrate leh police hotute kaihhruaina hnuaiah MSU leh ACCJSU hruaitute chuan Chakma House-ah hian mikhual an awm leh awm loh an enfiah a, damlo pakhat tih loh chu mikhual thleng an awm lo tih an finfiah. Hemi hnu hian resolution an siam a, kawng zawhtute chu an ṭîn darh.

MSU leh ACCJSU hruaitu ṭhenkhatte chu Ningani tlai khan Chakma House-ah kalin, in chhunga bungrua ṭhenkhat an tichhia nia thu dawn a ni a; Ningani zanah pawh kal lehin, Chakma House-a thleng mek mikhual zawng zawng, damlo tih loh chu chhuak vek turin an phût a ni.

MSU regional headquarters, Lunglei pawhin nimin khan Lunglei khawpui chhung­ah Chakma-te páwna chhuah an khap a; an thuchhuahah chuan, "Chakma páwn chhuah khap kan neih hi kan zirlaipuite thlavâng kan hauhna a ni a, hei aia na zawka chêt a ngaih pawhin kan inpeih reng a ni," an ti. Lunglei MSU-te hian Lungleia Chakma in luah tirtu Mizote chu ram leh hnam chhan nan in luahtir lo turin an ngen tih an tarlang.

MSU leh ACCJSU thuchhuah tarlan danin, September 28 khan Chawngte Higher Secondary School zirlaite'n sport an hmang lai chu Chakma ṭhalai rualin an tibuai a, Chawngte-a MSU hruaitute'n thil awmzia hriat tuma an kal leh boruak ṭha a awm theihna tura hma an laknaah, Chakma ṭhalai 200 velin Chawngte MSU hruaitu - Vanlalropeka, HC Vanlalzuia, David Lalkhawngaiha leh Francis Zothanpuia te chu kut an thlak a ni.

MSU & ACCJSU Resolution
4 Pawi khawiha Mizo kut thlaktu Chakma-te Mizoram sorkarin na takin hremna pe rawh se.
4 Chakma kut tuar Mizote Chak­ma Autonomous District Council (CADC)-in zangna­dawmna Rs. 1,00,000 ṭheuh pe rawh se.
4 Chakma kut tuar Mizote CADC-in zangnadawmna a pek hma chuan Chakma House, Aizawlah mikhual an thleng tur a ni lo.
4 Bangladesh aṭanga dan loa lo lut Chakma te, Mizoram sorkarin zawng chhuakin Bangladesh-ah thawn haw rawh se.