MNF Treasurer-in Donation lak a sawifiah

MNF treasurer Van­lalzawma chuan nimin khan Mizo Hnam Rûna inkhawmah thu sawiin, minister Zodintluanga'n Mizo Carbon neitu Ravi Gulgulia hnen aṭanga MNF-in donation la anga a sawi chu a sawifiah a; minister chuan a hre sual niin an sawi.

Vanlalzawma chuan, Ravi Gulgulia hnen aṭangin donation an dawng lo nia sawiin, "Ramu Gulgulia erawh chuan kum 2013 election dawn khan MNF party-ah donation pek ve a duh thu a sawi a, nuai khat a rawn thawh ve a, lawm takin kan lo dawng a ni. Heng hun lai hian Mizo Carbon chungchang hi sawi rîk a la awm lo hrim hrim," a ti.

MNF president Zo­ram­thanga pawhin thu sawiin, political party hrang hrangin donation an la vek niin a sawi a, "Kan party office-ah pawh hian mi zawng zawng hmuh theihin donation pete hming list ṭhenkhat chu kan tár nghe nghe," a ti a; minister Zodintluanga thil sawi chu sawi tur hriat loh thlak a tih thu a sawi.

Zoramthanga chuan, Mizoram leh India ramah Congress party an buai tak zet nia sawiin, ZNP president Lalduhoma'n kum thar thuchah a sawiah 'Pu Hawla ten BJP zawm an hnial lo' tih a sawi chu Lal Thanhawla'n a chháng ngam lo niin a sawi a, "Anni chu an party thuthlungah duh lam lama kal a thiang a, Congress hi rin aiin an dûp tawh a ni," a ti.

India ram leh Mizo­rama thil thleng zawng zawng chu Congress party tana ṭha lo lam vek nia sawiin MNF President chuan, "Kum 9 chhung kawng chhe tawh pawh 'MNF vang' tiin an sawi a, puh tur a zawng rau rau a nih chuan, Pu Ch Chhunga sorkar te, Brig. T Sailo sorkarte pawh puh law law se," a ti a; CM Lal Thanhawla chu thil âwm lo lutuka puh tur zawngah a puh a ni.