Chakma-te khua leh tui atana Kan pawm thiam a ṭul - CM

Chief minister Lal Thanhawla chuan Mizorama Chakma-te chu India danpuiin khua leh tuia a pawm thlapte an nih thu sawiin, "Khua leh tuia kan pawm thiam a ṭul," a ti.

Chief Minister hian nimin khan Congress Bhavan-ah thu sawiin, Chakma-te politics khelhna atan hman nasat an nih thu sawiin, "Politics a nih avang hian eng pawh hmanruaah hman a thiang kher lo. Mizorama Chakma-te hi India danpuiin khua leh tuia a pawm thlap an ni a, khua leh tuia kan pawm thiam a ṭul," a ti a, India danpui chu eng pawh pawhin nawr mah ila, Parliament thu lo chuan tihdanglam theih a nih loh thu a sawi.

Lal Thanhawla chuan Arunachal Pradesh mipuite'n Chakma-te khua leh tuia an pawm duh lo chu thiamawm a tih thu sawiin, "Chakma ṭhenkhat Arunachal Pradesh-ah sorkar laipuiin an thuneihna hmangin an dah lut a, khua leh tuite duh vang pawh ni loin. Tun hnaia India rama Court sang berin khua leh tui anga pawm vek turin a ti a, mahse Arunachal mite'n an pawm duh lo hi chu a awm khawp mai," a ti.

Mizote tun ang zela an kal chuan, chî leh chî zawnga India rama firfiak ber nih an hlawh ang tih a hlauhawm thu sawiin CM Hawla chuan, "Kan nêkchêp duh a nih pawhin tharum ni loin, zirna leh kawng hrang hrang ei leh bar zawngte ṭan lak a, nêkchêp tum zawk tur a ni," a ti a; tharum ni loin, danin a phal leh khua leh tuite'n an tih tur anga ṭan lak a pawimawh thu a sawi.

Lal Thanhawla sawi danin, kum 1995 aṭangin Mizorama Mizote aṭangin IPS-a tling an la awm leh lo a, IAS-ah mi pahnih/khat an tling. Chakma-te'n ṭan nacháng an hria a, UPSC exam hnuhnung berah pakua an tling. Mi pakuate chu IAS leh IPS ni vek lo mah se, dinhmun sang tak tak an chelh dawn a, nakin lawkah chuan Mizote'n an duh emaw, duh lo emaw, Mizoramah Chakma DC leh head of department an la awm dawn a ni.

Hnam tênau zawkte laka tharum thawha invilik tur a nih loh thu sawiin Chief Minister chuan, "Kut inthlak te, in suasamte hi a ṭha lo. An tidik lo a nih pawhin ngaidamtu zawka ṭan awm a ni. An tih tawh lohna atan erawh a sawipuitu zawkah kan ṭang tur a ni. Hetiang renga kan nawr chuan an tana ṭha tur zawk kan nawr chhuahsak ang tih a hlauhawm. Ram leh hnam tan a him ang em tihte ngaihtuah a pawimawh," a ti.
Chief Minister chuan, Chakma-te humhim chu state sorkar mawhphurhna a nih thu sawiin, "India khua leh tui an nih avangin kan ṭan emaw ṭan lo emaw, kan duh emaw duh lo emaw, India sorkar leh Constitution angin anmahni humhim hi kan mawhphurhna a ni," a ti a; dan leh thupek kengkawhtute chu a ṭul anga che tura an inpeih thu a sawi.

Lal Thanhawla sawi danin, deputy speaker-a C Chawngkunga a ṭan laiin political party-te a ko khawm a, Chakma Autonomous District Council (CADC) pian chhanah political party-te inpuhmawh tawh lo tura thu dah a ni. CADC chu North Eastern Re-organisation-in a hrin chhuah a ni a, Lai leh Mara ten Chakma-te nena district council neih an duh loh avangin, sorkar laipui tan Chakma bil pek bak tih ngaihna a awm lo niin a sawi.
MNF-in CBI ko lut tura an phût chungchangah Chief Minister chuan, "CBI-te hi duh duha koh luh theih an ni lo tih hre chiang bertute an ni. Eirua min ngai a, min hrem se an duh a nih chuan criminal case file mai se," a ti.