MZU-in VC a neih tlai chhan CM inrawlh vang - BJP

BJP, Mizoram Pradesh hruaitute chuan nimin khan Aizawl Press Club-ah thuthar thehdarhtute an kâwm a; Mizoram University (MZU)-in vice chancellor (VC) nghet a neih tlai chhanah chief minister Lal Thanhawla puhin, MZU zirlaite hnena ngaihdam dil turin an phût.

Mizoram BJP president Prof. JV Hluna chuan, September 24-25 chhungin New Delhi-a BJP National Executive meeting-ah an tel thu sawiin, "Meeting kan neih chhung hian Human Resources Development (HRD) minister Prakash Javadekar ka hmu a, MZU VC chungchang leh CSS Hindi teacher-te chungchang kan sawipui," a ti.

Prof. JV Hluna chuan, HRD Minister chuan MZU VC chungchang chu system ang taka kalpuia peih thawhkhat a ni tawh tih a lo hrilh tih sawiin, "Search Committee-in mi pathum President hmaa an chhawp chhuah hnuah Mizoram Chief Minister-in a inrawlh lohna turah inrawlhin, India President leh Prime Minister hnenah lehkha a thawn a ni," a ti a; CM lehkhathawn chuan ngaih pawimawh a hlawh lo niin a sawi.

VC Search Committee-in an chhawp chhuah zinga pakhat a inhnuhdawh avangin a hun taka VC ruat theih a ni lo nia sawiin, JV Hluna chuan, "MZU-in VC kan neih tlai chhan chu Pu Lal Thanhawla vang a ni tih mipuiin i hre nawn ang u. A tih tur ti loin, a tih loh tur zawk a tih ṭhin avangin Mizoram hian harsatna kan tâwk fo," a ti.

BJP hruaitute sawi danin, MZU VC chungchangah hian Lok Sabha MP CL Ruala pawh a inrawlh a, August 4, 2017 khan HRD Minister hnenah MZU VC ni lai chu Mizo zingah VC atan tling leh tlak bera ngaih a nih avangin, dah nghet tura ngenna lehkha a thawn a ni.

Dr JV Hluna chuan, Mizorama CSS Hindi zirtirtu mi 1,305-te rawih nawnna pe thuai tura HRD Minister an ngen thu sawiin, "HRD Minister chuan Mizoram sorkar lamin Hindi teacher a rawihte hi certificate fel lo leh qualify lote an awm nual vanga endik a ngaih thu te, train an ngaih thute an thlen avangin harsatna a awm thu min lo hrilh," a ti.

Mizoram sorkarin clearance min pek veleh CSS Hindi zirtirtute rawih nawnna chu release a nih tur thu HRD Minister-in a lo hrilh tih sawiin JV Hluna chuan, "CSS Hindi zirtirtute rawih nawnna chungchangah hian state sorkar thil tih dan a ngaihṭhatthlak loh hlein kan hria," a ti a; Mizoram sorkar chu Hindi zirtirtu neih loh chhanah an puh a ni.