Chite lui thenfai hnatlangpui neih a ni

Save Chite Lui Coor­di­nation Committee (SCLCC) leh State NSS Office, Mizoram huai­hawtin nimin khan Chite luia bawlhhlawhte thenfai hnatlang neih a ni a, Aizawla college hrang hrang zirlai ṭhahnem tak an thawk chhuak.

Chite lui thenfai hna­tlangpui thawh khatna hi Chite Mini Sports Complex leh Bethlehem Vengthlanga Chite kaiah ṭan a ni a; Pachhunga University College, Govt. Aizawl College, Hrang­bana College, Zirtiri Resi­dential Science College, Aizawl North College, Aizawl West College, T Romana College, Johnson College, Mizoram Hindi Training College leh Mizoram Law College aṭangin NSS volunteer (zirlai) 400 chuang an thawk chhuak a ni.

Chite Mini Sports Complex-a a hawnna inkhawmah Aizawl mayor PC Lalhmingthanga'n hnatlangte a vailiam a; Bethlehem Vengthlang kaia a hawnnaah Mizoram Pollution Control Board chairman RC Thanga'n hnatlangte a vailiam thung. Hnatlangah hian zirlaite chuan Chite lui dunga bawlhhlawhte an chhar khawm a, an bawlhhlawh chhar khawm chu truck trip li a tling.

Chite lui thenfai hna­tlangpui hi a thawh hnih­na chu November 24, 2017-ah neih leh tum a ni a; chutah chuan Aizawla higher secondary school-a NSS unit-te an thawk chhuak ve thung dawn a ni.