MNF Treasurer thusawiah MPYCC an lawm

Congress party ṭhalai chuan thu­chhuah siamin, nimina Mizo Hnam Rûna inkhawmah MNF treasurer Vanlalzawma'n, Ramu Gulgulia hnen aṭanga kum 2013-a cheng nuai khat a dawn thu a sawi chu lawmawm an tih thu an tarlang.

Mizoram Pradesh Youth Congress Committee (MPYCC) chuan, MNF Treasurer-in Mizo Carbon neitu Ravi Gulgulia pa (father) Ramu Gulgulia hnen aṭanga Rs. 1,00,000 a dawn thu mipui hriata a puang chu lawmawm an tih thu an sawi rualin, pawisa an inpek dan e­rawh sawifiah tel an phût thu an sawi a; Vanlalzawma'n, 'MNF party-ah donation pek ve a duh a,' tia a sawi chu lehkhaa inziak nen a inpersan hle niin an sawi.

MPYCC tarlan danin, MNF Treasurer-in Mizo Carbon neitute aṭanga pawisa a dawn thu a ziahnaah, 'Ramu Gulgulia hnen aṭangin party fund tur pawisa ka dawng tawh a, tihbuai tawh loh ni se,' tiin November 13, 2013-ah a ziak a ni.

Congress ṭhalaite chuan, Bawngkawn kawng kawi zauhna tur MNF President hminga land lease dah tawh, hralh emaw, mi dang hnena pek theih loh tur ni si, cheng nuai 150-a an hralh chungchang chu sawifiah thuai turin MNF president Zoramthanga an phût tih an sawi bawk.