State Level Science Seminar buatsaih

SCERT Science Promotion Wing chuan nimin khan Chanmari YMA Hall-ah State Level Students Science Seminar an buatsaih a, School Education minister H Rohluna'n a hmanpui. Seminar-ah hian zirlai 13-te 'Swachh Bharat: Role of science & technology promises and challenges' tih thupui hmangin an inel a ni.

H Rohluna chuan, kum tina buatsaih ṭhin Science Seminar chu science lama Mizoram tana hmasawnna thlentu a nih ngei a beisei thu sawiin, "Mizote hi hnam naupang tê kan nih avangin ram hruaitu hmasa leh mi ṭhahnemngaite'n science leh mathematics lamah state dangte rual pha thei turin kawng hrang hranga hma an lo lak tawhna chu vawiina mite hian a rah kan seng mek a ni," a ti a; zirlaite chu mi­thiam hmasate'n hma an lo laknate chhawm nung zel turin a chah.

Seminar-ah hian pakhatna chu Grace Academy, Siahaa pawl 10 zirlai Miranda Vytuchho a ni a, pahnihna chu Hill Gate School, Siahaa pawl 10 zirlai Chiineihkimi Khongsai niin, pathumna chu St. Pauls HSS-a pawl 9 zirlai Laldinmawia Chawngthu a ni.

Seminar-ah hian district tina District Level Students Science Seminar neih tawha tiṭhate an tel a; a tiṭha ber chu kumin November thlaa Nehru Science Centre, Kolkata-a neih tur National Science Seminar-ah Mizoram aiawhin a kal ang.