World Heart Day hman a ni

Nimin khan khawvel hmun dang rualin Chhinga Veng community hall-ah World Heart Day hman a ni a, minister R Lalzirliana'n a hmanpui.

Inkhawm hi Mizoram State Cancer Institute (MSCI)-a medical oncologist Dr Jeremy L Pautu-in a kaihruai. R Lalzirliana chuan, Mizote chu hrisel lam ngaihthah tak, taksa sâwizawi lam uar lo leh ei-in lamah insûm tâwk loh vanga India rama cancer vei tamna ber a nih thu sawiin, "Mipuite hriselna sorkarin a vei em em a, sport lamah ṭan a la nasa a, Health department pawhin theihtawpin hriselna chungchang inzirtirna te, free clinic-te a huaihawt ṭhin," a ti.

World Heart Day hmannaah hian Aizawl Civil Hospital-a cardiologist Dr Loncy V Lalzarliana'n lung (heart) lam natna leh a inven dan a sawi a; NPCDCS state nodal officer Dr Eric Zomawia'n natna inkai chhawn theih loh chungchang a sawi thung.

Kum 1946-a din World Heart Federation chuan kum 2000 aṭang khan khawvel ram tina chengte hnenah natna inkai chhawn theih loh, non communicable disease (cancer, heart attack, etc.) chungchang zau taka inzirtir a nih theih nan kum tin September 29-ah ‘World Heart Day’ a hmang ṭhin a ni.