KHAWTHLIR

Lui humhalh
YMA sub-headquarters, Lunglei leh Enviroment, Forest & Climate Change (EFCC) department hmalaknain September 28, Ningani khan Pukpuia Chawngbawla Hall-ah Tlawng lui leh Hmawngva lui humhalhna programme hman a ni a, Lunglei SP Lalṭhafamkima Jongte khuallian a ni. YMA-in lui a humhalh hi Lunglei-Aizawl World Bank Road Tlawng lei aṭanga chhak lam leh thlang lam km. khat huam chin a ni.

MZP-in dem
MZP chuan thuchhuah siamin, Ningania Chakma ṭhalaite'n Chawngte-a MSU hruaitute kut an thlak chu pawi an tih thu leh an dem thu an tarlang a, "Hetiang thil kan ram ngeiah a thleng leh ṭhin hi ná kan ti hle," an ti. MSU hruaitute kut thlaktu Chakma-te chu a rang thei ang bera zawng chhuak a, hrem turin thuneitute an phût thu leh, hemi chungchanga MSU hmalakna chu an thlàwp tlat thu an tarlang bawk.

Ruih theih thil Ti lo turin ngen
Laipuitlang khawtlang chuan thuchhuah siamin, an veng chhungah veng dang aṭangin ruih theih thil ti tura kal lo turin an ngen. An vengah zu leh ruih theih dang ti an man chuan an chungah a na thei ang bera action lak an tum thu tarlangin, "Chhun leh zan inzawm zatin Laipuitlang Branch YMA kaihhruainain duty a ni a, duty hi 2018 kum thar thlenga kalpui tur a ni," an ti.

MZU workshop
Mizoram University (MZU) Examinations department chuan nimin khan MZU administrative hall-ah 'Sensitization of data entry - Continuous and practical mark,' tih thupui hmangin workshop an buatsaih a, Mizorama college 27 aṭangin mi 52 an tel. Workshop-ah hian examination software hman dan leh continuous assessment (internal) leh practical mark thun dan zir a ni.