Congress-in manifesto an tlangzarh ; Mizoram hi hausaah siam kan tum - Lalsawta

Mizoram Pradesh Congress Committee (MPCC) chuan kum 2023-a Assembly inthlanpui atana Congress party election manifesto no. 1 'Ṭang puihna' (Mizoram Economic Development Initiative) tih chu nimin khan Congress Bhavan-ah an tlangzarh. MPCC president Lalsawta chuan, an manifesto-te chu an tihhlawhtlin theih vek tur a nih thu leh sorkarna an chan chuan Mizoram chu ram nuam leh hausaah siam an tum thu a sawi.

Manifesto tlangzarhtu MPCC President chuan, Pathian duh dan leh an duh dan a inmil em tih ngaihtuah fo a ṭul thu sawiin, "Pathian duh dan a nih loh chuan tum hle mah ila eng mah kan ni chuang lo ang. Kan manifesto-te hi Pathian hmanraw puitling a ni thei. Pathian hruainain kan kal niin kan hria. Sorkarna kan chan chuan Zoram hi ram nuam leh hausaah siam kan tum," a ti.

Manifesto tlangzarh zawha thuthar thehdarhtute a kawmnaah Lalsawta chuan, an manifesto chu 'Ṭang puihna' an tih chhan sawiin, "Ṭang lo chu puih an har a, ṭangte tan din khawchhuah theihna a awm. Dinhmun hniam aṭanga ding chhuak tam tak an awm a, Mizoramah ngei pawh eng emaw zat an awm," a ti a, ṭangte chu ṭanpui an ngaihna zâwnah zel ṭanpui a nih tur thu a sawi.

MPCC President chuan, ṭang hleithei lo, a nachang hre lo, ṭan pawh tum lote an awm thu sawiin, "Chungte pawh chu kan hma vek a ni. Zirtirin kan kaihruai ang. Sorkarin a tana dinchhuahna tur kan buatsaih dawn," a ti.

Duh rêng vang ni loa rilru leh taksa lama harsatna nei an awm thu sawiin Lalsawta chuan, "Chung mite chuan ei leh in tur, khawsakna tur, damloh nikhuaa inenkawlna tur an mamawh ve. An tan pawh ruahmanna siam a ni dawn," a ti a, an manifesto-in a huam zau thu a sawi.

MPCC president Lalsawta chuan, an sorkar laia an tih leh tih lohah sawi a awm thei tih sawiin, "Kan sorkar lai khan kan lo ti lo a nih pawhin a dik, thiam thu sawi tur kan nei lo. Khawvel ṭhang chak takah hian ṭhalaite'n hma an sawn a, rual an awt tawh. Kan sorkar hmasak laia kan ngaihtuah phâk lohte min ngaihtuah chhuahtir a ni," a ti.

Vanglaini palai zawhna chhangin MPCC President chuan, manifesto chu a tahtawlin an la tlangzarh zel dawn tih a sawi a, "Health sector, education sector, ramri thlengin kan la tlangzarh ang," a ti a; inthlan dawn hnaiha manifesto tam tak, inziak pût tlangzarh ngawt ṭha an tih loh thu a sawi.

Inthlan awm turah thawhpui an neih dawn leh dawn loh zawhna chhangin Lalsawta chuan, "Tute nen emaw thawh dun ṭul kan ti lo. Thil ṭha kan duh a, thil ṭha duhte chu kan thawhpui thei reng thung," a ti.

Congress party manifesto phek hmasa berah chuan, 'Ṭang puihna hnuaiah ṭanpuina leh chhawmdawlna hi project azirin cheng nuai bi aṭanga an mamawh inṭâwm a nih phei chuan vaibelchhe tél thlenga puih a ni ang' tih a chuang a ni.

MPCC MANIFESTO NO. 1
• Kan thar chhuah thiar velna tur, a fûr a ṭhála hman theih feh kawng, mipui mamawh phuhru zo ngei tur a tam thei ang ber kan siam ang.
• Tui lak rintlak kan neih theihna atan theihtawpin hma kan la ang.
• Thei leh thlai thar hralhna hlawhtling tak kan neih theihna atan hma kan la ang.
• Eizawnna bul ṭan turte chu sorkarin an hnathawh tur chungchangah zirtirna leh kaihhruaina ṭha tak pe hmasain a ṭul angin a chhawmdawl ang.
• Eizawnna bul ṭanna tur ram nei lote tan ram leilung behchhan kher lo pawha eizawnna ngêlnghet an neih theihna tur kawng ruahman a ni ang.
• Sumdawnna bul ṭan duh emaw, industry lam din duhte emaw tan a bika zirtirna uar taka kalpui a ni ang.
• India ram hmun dangah emaw, ram dangah hnathawk tur emaw, sumdawng tur emaw tan computer thiam tlem tak leh ṭawng dang thiam a ngaih avangin zirna leh ṭawng zirna changtlung takin kalpui a ni ang.