Home Minister Chama'n e-Forensic System a hawng

Home minister Lalchamliana chuan nimin khan Forensic Science Laboratory (FSL) conference hall-ah e-Fo­rensic System leh Mizoram FSL Annual Report 2021-2022 a tlangzarh.

Ministry of Home Affairs hmalakna pakhat, ICJS hnuaiah e-Forensics system hi pawimawh tak pakhat a ni a, pawi khawihtute chunga dan anga rorelna a hun taka hlen a nih theih nan kum 2018-ah hawn a ni. Police, forensic, court, prosecution leh prison-te'n anmahni zâwn ṭheuha an hmalaknate awlsam taka an inhriatpawh theih nan CCTNS, e-Court, e-Prison, e-Forensics leh e-Prosecution hmangtein thlun zawm a ni.

Lalchamliana chuan, Forensic Science Laboratory chu thawktu tam lo mah se, an thawh ṭhat leh ṭhahnemngaihna sorkar laipuiin a hriatpui a nih thu a sawi a, "FSL hi thubuai hlabuai remnaah department ṭangkai tak a ni," a ti.

Kum 2018 khan Inter-operable Criminal Justice System (ICJS) chu Union Home Ministry-in a rawn duang tih sawiin Minister chuan, "He system hnuaiah hian Police, Court, Prison leh Excise & Narcotics department-te thawhho vekna tur te, court rorelna chak zawka kalpui leh, thil tisualte rang zawka hrem an nih theih nan online system-a inchinfel zung zung theihna turin ruahmanna a siam a ni," a ti a; e-Forensic system hmang turte chu mipui hriata puanzar tur chin hre turin a chah.

Lalchamliana chuan, Mizoram FSL chu e-Forensic bikah India rama ti hmasa ber a ni tih sawiin, "India ram judicial system-ah misuala puh hi finfiahna ṭha tak nen lo chuan thiam loh chantir an ni lo a, finfiahna ṭhenkhat court-a thehluh lawk a nih ṭhin loh avangin rei tak chhung thuthlukna siam a ni ṭhin," a ti a; e- Forensic system hnuaiah court hnathawh leh thuthlukna chak zawk siam a nih theih a rin thu a sawi.

Mizoram FSL hi National Crime Records Bureau thuchhuak anga India rama expert report - digital signature hmanga finfiah theih hmang hmasa ber leh paperless FSL hmasa ber a ni a; kumin January aṭanga August chhungin thubuai 756-ah thil (exhibit) 18,886 an endik tawh a ni.