Governor-in Sainik School a tlawh

Governor Dr Hari Babu Kambhampati chuan nimin khan Chhing­chhipa Sainik School a tlawh a; Chhiah­tlangah Pradhan Mantri Ujjwala Yojana (PMUY) hmanga gas connection nei tharte leh Pradhan Mantri Awas Yojana - Urban (PMAY-U) hnuaia chenna in nei tharte a tlawh.

Sainik School-ah hian Governor chuan, principal leh a thawh­puite'n Sainik School ṭha tak ni tur leh hmun danga Sainik School-te dinhmun pha tura theihtawp an chhuah chu fakawm a tih thu a sawi a, "Mizoram sorkarin sikul ṭha bik Mizorama zirlaite tan a buatsaih thei hi a lawmawm hle," a ti.

Chhingchhip Sainik School-in India ram hmun dangte entawn tur leh hma hruaitu ni tura hmeichhia an luhtir chu chhuanawm a tih thu sawiin Larsap chuan, "Sainik School-a zirlaite hi armed force-ah an thawk vek kher lo a nih pawhin, khawtlang leh ram tana khua leh tui entawn tlak ni tura chher an ni," a ti a; India ram chakna chu danglamna tam tak kara inpumkhatna leh inunauna ṭha a nih thu a sawi.

Sainik School prin­cipal Wcdr. Shahul Hameed chuan an harsat­na - tui bill leh electric bill sang lutuk chungchang Governor hnenah a thlen a; Governor chuan kawlphethaa harsatna sutkian a nih theih nan campus chhungah Solar Power Generation Plant bun turin a ràwn. Tui bill chu Serchhip DC leh PHE department-te'n chingfel turin hma an la mek tih a sawi.

Hari Babu Kambham­pati hian Sainik School hmunhmate a fang kual a; a pualin cultural prog­ramme an buatsaih a ni.

Sainik School-a lut turin India ram pum huap entrance test paltlang a ngai a, zirlai pakhat tan kum khatah Rs 1,85,000 vel sên a ngaia chhût a ni. Kum tin pawl 6-ah mipa 60 leh hmeichhia 10 lak a ni a, pawl 9-ah erawh chuan seat 10 chauh awmin, mipa chiah lak a ni ṭhin.

Governor hian Chhiahtlanga PMUY leh PMAY(U) hnuaia hamṭhatna dawngtute a tlawh a; sorkar laipui aṭanga mipui hamṭhatna tur scheme tam tak leh social security scheme ṭha tak takte chu tun aia nasaa puanzar a ngaih thu sawiin, "Tunah hian a dawng tur zatin an la dawn hlein a rinawm," a ti. Sorkar hnathawkte leh bank hotute chu an mawhphurhna hlen turin a chah bawk. Governor hi Serchhipa sorkar official-te'n a ṭawiawm a ni.