Mizoram tungding leh turin mahni inhlan ral ngam a ṭul - Lalduhoma

ZPM chuan an hruaitute pualin nimin khan Tourist Lodge, Chal­tlangah Ṭawngṭai Retreat thawh hnihna an buatsaih a, Dinthar Lehna speaker Upa C Zairemmawia'n Pathian thuchah a sawi. ZPM leader Lalduhoma chuan, eiruk theihna hmuna a awm chhungin thlêmna a tawh ngai loh thu leh Mizoram tungding turin mahni inphal leh inhlan ral ngam a ṭul thu a sawi.

Lalduhoma chuan, "Corruption chungchangah thlêmna awmna hmuna ka awm ve chhungin thlêmna ka tâwk ngai lo a, ram hruainaah pawh ka tâwk lo ang. Hemi chungchangah hian ka inring tâwk a, ram mipui pawh min ring tâwk turin ka ngen a ni," a ti.

ZPM Val Upa Council a rin tâwk thu sawiin Lalduhoma chuan, "An mitmei véngin sorkar leh party kan kaihruai ang. Kan sorkar hrawn tawh hruai khawlotu chu ruling mipui an ni ziah," a ti a; tuna Mizoram sorkar angah hruaitu nihna thlâkhlelhna a neih loh thu a sawi.

Lalduhoma chuan, Mizoram sorkar hnathawk zingah thil dik lo tih duh lo ṭhahnem tak an awm tih sawiin, "Lui hnár aṭang hian i fím tlang ang u kan tih chuan sorkar hnathawkte'n an duh ang. Mipui náwlpui pawhin kan rilru sûkthlêk tihdanglam a ngai," a ti.

ZPM leader Lalduhoma chuan, Mizoramah political revival a thleng mek nia sawiin, "Sorkar ṭha, dik leh chak duhnain mipui an tuihâl a ni," a ti a; Mizoram tun din thar lehna turah 'Ka thlarau zawkin le' tih a tâwka a hriat thu leh kawng tinrêngah siamṭhatna mamawh a nih thu a sawi.

Lalduhoma chuan, "Engvangin nge sorkar hi kan châk viau? Kan thil tum nena enin kan rilru a thianghlim tâwk em? Sorkar tawhte tih dan kan mitthla a nih chuan kan sorkar a ṭulna ka hre lo," a ti a; ram maichâmah party zawng zawng an inhlan a ngaih thu a sawi. "Kan ram tungding leh tur hian kan tih theih chu mahni inphal, inhlan ral ngam a ni. Pathian duh záwngah ding nghet ila, inringtâwk takin hma lam panin i kal ang u," a ti bawk.

Thuchah sawitu Upa C Zairemmawia chuan, ZPM chauh hmaa thusawia a inngaih loh thu sawiin, "Kan rama political party zawng zawng worker-te hi thil ti dik lotu ber kan ni, hotute nawr dik lotute pawh kan ni. Kalphung thar kan tih rual hian, keimahni kan thar em tih ngaihtuah a ngai. Political party-te hian mipui beidawngte beiseina siamsak turin tih tur kan nei a ni," a ti.