Rashtriya Poshan Maah khâr a ni

September thla chhunga hman ṭhin Rashtriya Poshan Maah (National Nutrition Month) chu nimin tlai khan Women & Child Development (WCD) directorate huaihawtin Taxation Auditorium-ah khârna hun hman a ni.

Rashtriya Poshan Maah khârna inkhawm hi WCD director Lallianpuii'n a kaihruai a, Social Welfare & Tribal Affairs joint secretary Donnie khuallian a ni. Khuallian chuan, kumina Poshan Maah hman chu hlawhtling taka hman a nih theihna tura PHE, Health & Family Welfare leh Rural Development department-te leh MzSRLM leh pawl leh mi hrang hrangte'n an thawhpui chu lawmawm a tih thu a sawi.

Poshan Maah hi kum 2018-ah hman ṭan niin, September thlaah hman ṭhin a ni a; Nutrition Month chhungin chaw ṭha ei tâwk loh avanga naupang taksa chak lohna hrang hrang tihṭhatna tur te, anemia vanga nu nau pâi leh tleirawla harsatna thlengte hmuh chhuah leh ei tur hrisel chungchang inzirtirna hunte hman ṭhin a ni.