MNF a thuthlungah a la ding reng - Lalchhandama Ralte

MNF adviser Lalchhandama Ralte, minister of state chuan nimin khan Mizo Hnam Runa inkhawmah thu sawiin, MNF chu a din tirh aṭangin a thuthlungah a la ding reng niin a sawi.

Lalchhandama Ralte chuan, "MNF hi a din tirh aṭangin a thuthlungah a la ding reng a, khawvel hmun hrang hranga Zo fate tan a ding zel dawn," a ti a; MNF party mite chu eng hna pawh thawk se, kuttling leh rintlaka thawk turin a chah.

Myanmar aṭanga Mizorama ráltlân naupang sikul kai rual ṭhahnem takte tan a thlâwnin sorkar sikulah uniform leh zirlaibu pek vek an nih thu sawiin Lalchhandama chuan, "Ṭha takin zirna an dawng a, matric exam hmabakte tan pawh ruahmanna siamsak niin, mi 28 lai an pass a ni," a ti.

Education minister Lalchhandama chuan, Mizoram zirnain hma lam a pan zel nia sawiin, "Mipuite'n sorkarah rinna an nghah avangin sorkar sikula lut an pung zel a, Samagra hnuaia thawkte hlawh tihpun a ni," a ti a; hei vang hian chhungkaw tam tak chu sorkar chungah an lawm hle niin a sawi.

Lalchhandama Ralte chuan, tun hnaia USA a tlawhnaah US sorkar hotute hnenah Myanmar ráltlânte hamṭhatna tur ngaihtuahin hma a lak thu a sawi a; America mipui leh ṭhalaiten darkar bîa hna an thawk chu ṭha a tih thu leh Mizoramah kalpui ve theih atan ṭha a tih thu a sawi bawk.