Thu dik lo thehdarh lo turin mipui chah

Mizoram Police chuan tun hnaia social media-a naupang rûkbo hmang thuthang chungchangah thuchhuah a siam a; thuthang chu thu belhchian dâwl lo a nih thu leh a thehdarhtute chu dan hmanga hrem theih an nih thu tarlangin, thu dik lo thehdarh lo turin mipui an chah.

Police thuchhuah chuan, tun hnaiah naupang rûkbo hmang chungchangah thu dik tâwk lo social media hrang hrangah thehdarh a nih thu a tarlanga, "Mipuiah ṭul loa chiaina leh buaina tam tak a thlen a ni. Thuthang dik lo avang hian ram chhung hmun dangah pawh kut inthlakna hialte thlengin, pawisawi lote pawhin an tawrh phah tawh a ni," an ti.

Thu belhchian dâwl lo leh dik tluantling lo, mipui tichiai thei thehdarh a, social media-a thehdarh chu thil pawi tak thlen thei a nih thu leh a thehdarhtute dan hmanga hrem theih an nih thu an tarlang a ni.

Mizoram Police chuan, finfiah loh thuthang hriate chu thehdarh lo turin an chah a, "Finfiah tura police hnena a rang thei ang bera hriattir ṭhin tur a ni a; thu dik lo thehdarhtu emaw, thil dik lo ti hriat kan nei emaw a nih chuan a rang thei ang bera police leh police officer-te hnena thlen vat ṭhin turin mipui kan ngen a ni," an ti bawk.