Siaha DC Office kum 50-na lawm

Siaha DC Office kum 50 tlin lawmna nimin khan Siaha Circuit House Complex-ah neih a ni a, minister of state Dr K Beichhua-a'n a hmanpui.

Dr K Beichhua chuan, Mizorama DC pisa piang hmasa pathumte chu sap missionary-te awmhmun khuarna vek a nih thu sawiin, "Presbyterian Kohhran dintuin Aizawlah, Baptist Kohhran dintuin Lungleiah leh ECM dintuin Saikao (Chhimtuipui)-ahte a ni hlawm. Siaha DC pisain kum 50 hmel a lo hmu ta hi sorkar pisa pakhatin kum 50 hmel a hmu a ni ringawt lo a, awmze ril tak nei a ni," a ti a; Pathian remruat kal zel a nih avangin Siaha mipui tan a hlu tih a sawi.

Aizawl leh Lunglei DC pisate'n golden jubilee lawm nachang an hriat loh laia Siahain ropui taka golden jubilee an lawm chu bawrhsap Lalsangliana leh a thawhpuite thawhrimna vang a nih thu a sawi a; DC pisa a awm theihna tura tha leh zung lo sengtute chungah lawmthu a sawi bawk.

Inkhawmah hian Palak bialtu MLA KT Rokhaw pawhin thu a sawi a; MLA hlui S Hiato leh MADC chief executive member H Malvina bakah, MTP, MChP leh MSO president-te'n thu an sawi bawk a ni.

Minister hian golden jubilee lawmna puala Siaha khawpuia VC area fai intihsiak lawmman a sem a, KT Rokhaw-a'n jubilee lawmna puala marathon race lawmman a sem thung.