Hmarchhak biala NDA-a lemchang awm chhun chu MNF - BJP President

BJP Mizoram Pradesh president Vanlalhmuaka chuan nimin khan an party pisaa inkhawmah thu sawiin, MNF party chu India hmarchhak biala National Democratic Alliance (NDA)-a lemchang awm chhun an nih thu a sawi.

Vanlalhmuaka chuan, nihna anga lang chhuak ngam lote ram hruaitu atan an ṭha ngai lo nia sawiin, "NE state-a NDA lemchang awm chhun chu MNF hi an ni a, a pawi hle. Kan ram harsatnaah hian a mawhphurtu chu sorkar lai an ni a, central khuan lemchang leh lemchang lo chu an hre khawp. Ram hruaitute'n dâwt hmanga ram an hruai chuan mipuite'n kan tuar ṭhin," a ti.

Lunglei Municipal Council inthlan turah tun hnaia campaign hawnna an hman ṭuma an hmuh chhuah chu - kawng chhia a nih thu sawiin Vanlalhmuaka chuan, "Kawngpui ṭha kan duh tak tak a nih chuan Mizoram mipui hian BJP kan sorkartir a ngai," a ti a; kawngpui ṭha pe theitu chu BJP chauh an niin a sawi.

BJP President chuan, kum 2023-ah BJP chu sorkarah an tel ngei dawn nia sawiin, "Chumi hnuah chuan Zoram mipui hian hmasawnna hmél kan hmu ṭan thei tawh dawn a ni," a ti bawk.