KHAWTHLIR

Thisen pe
Pachhunga University College NSS chuan nimin khan an college-ah Civil Hospital, Aizawl tan thisen unit 72 an pe a, petute mipa 49 leh hmeichhia 23 an ni. PUC hian September 2022 chhungin blood donation camp ṭum nga neiin, department hrang hrangin a inchhâwkin an pe a, thisen unit 421 an pe a ni. Nimin vek khan ṬKP, Phawngpui North Bial chuan BCM Sangaua BCM Peniel kohhran hall-ah Siaha District Hospital tan thisen unit 23 an pe a, petute mipa 20 leh hmeichhia pathum an ni.

Home tlawh
Lal Bahadur Shastri National Academy of Administration, Mussoorie (LBSNAA)-a training mek IAS leh IRS officer paruk, Lungsena awm mekte chuan nimin khan Lungleia home hrang hrang an tlawh a; Lunglei Chanmari-ah India tana zalenna sualtu Darthawma Renthlei (L) in an tlawh bawk.

Lemziaka inelna
Environment Forests & Climate Change department chuan 68th National Wildlife Week pualin nimin khan Secretariat conference hall-ah college leh high school zirlaite tan lemziaka inelna an buatsaih a, chief wildlife Lalrammawii Sailo-in a hawng. Intihsiakah hian zirlai 80 vel an tel a ni.

KPP inkhawmpui
Mizoram Presbyterian Kohhrana Kohhran Pavalai Pawl chuan nizan aṭang khan Mission Vengthlang Kohhranah ram pum huap Kohhran Pavalai Pawl Intawhkhawm vawi 5-na an hmang ṭan a, naktuk Pathianni zanah a ṭiak ang. Inkhawmpuia thupui chu 'Pathian thuawih' tih a ni.

MLA-in kâwm
Mizoram Youth Commission chairman Dr Vanlalṭanpuia, MLA chuan September 28, 2022 khan New Delhi Mizoram House-ah MYC kaltlanga Super IAS 40 programme hnuaia Vajiram & Ravi, Vision IAS leh ALS-a UPSC coaching kal mekte a kâwm a, an dinhmun leh mamawhte a sawipui.

Jubilee lawm
Armed Veng Middle School chuan nimin khan an kum 50 tlin an sikul tualah an lawm a, Aizawl East SDEO Lalsikula'n a hmanpui. Jubilee lawmna inkhawm hi Organising Committee chairman K Lalfakzuala, Armed Veng LC chairman-in a kaihruai a, SDEO hian jubilee lungphun a hawng a ni.

Traffic awareness
Traffic Police chuan nimin khan Mizo Higher Secondary School-ah traffic rules leh kawngpuia himna chungchang inzirtirna an buatsaih a, zirlai leh zirtirtu 600 chuang telin, thil pawimawh hrang hrang an hrilhfiah a ni.

PS sawn pawm
Lunglei District Standing Committee chu nimin khan additional DC Donny Lalruatsanga kaihhruaiin DC conference hall-ah an ṭhukhawm a, polling station pali sawn dilna an pawm.

Minister-in hmanpui
Minister of state K Lalrinliana chuan nimin khan Kolasib Parish Hall-ah C Zakhuma Higher Secondary School Annual Sports khàrna a hmanpui. Minister chuan, sikul tihchangtlun hna thawh zawmna atan MLA fund aṭangin Rs 5,00,000 a ruahman dawn thu a sawi.