Hripui vei enkawl lai mi 145 an awm

September 29, Ningani khan Mizoramah Covid-19 vei mi 33 hmuh chhuah a ni a, nimin khan hripui vei dam tawh mi 52 chhuahtir niin, thi an awm lo. Nimin tlai khan hripui vei enkawl lai mi 145 an awm.

Ningania Covid-19 positive hmuh thar mi 33-te chu mipa 17 leh hmeichhia 16 niin, rapid antigen test hmanga hmuh chhuah vek an ni a; swab sample 346 endik aṭanga positive hmuh zat 33 chu 9.54% a ni.

Nimin tlai dinhmun angin, Siaha leh Lawngtlai district-ah Covid-19 vei enkawl lai an awm tawh rih lo a; Lunglei, Champhai, Kolasib, Serchhip leh Hnahthial district-ah pawh mi 10 aia tlem vek an awm rih. Active case tamna ber Aizawl district-ah mi 49 an awm a ni.

IDSP record angin, Mizoramah Covid-19 vei 2,38,436 hmuh chhuah a ni tawh a, mipa 1,11,078 leh hmeichhia 1,27,358 an ni a, mipa aiin hmeichhia 16,280-in an tam zawk. Nimin tlai dar 5 thleng khan mi 2,37,568 (99.64%) chhuahtir an ni tawh a, mi 723 (0.30%) thi tawhin, enkawl mek mi 145 (0.06%) an awm.