Hurricane Ian vangin thi pun belh zel
United States, Florida state-a thlipui, Hurricane Ian tleh chuan chhiatna nasa tak a thlen a, chhanchhuah hna thawh chhunzawm mek a ni.
Thlipui tlehin chhiatna a thlena thi hi mi 10 an tling tawh a, hetihlai hian official-te erawh chuan thi zat hi hei ai hian an tam an rin thu an sawi.
US president Joe Biden chuan category one, Hurricane Ian chu Florida state-a thlipui tleh hlauhawm ber a nih theih thu sawiin, nunna ṭhahnem tak chan theihna a ni, a ti.
Hurricane Ian hian Florida state a nuai hnuah, North leh South Carolina state lam a pan tawh a ni. Mahse chhiatna nasa tak a thlen avangin Florida state-a mi maktduai 2.2 vel chuan power supply an la nei lo a, sumdawnna lam thlengin a nghawng buai a ni. Tuilian pawhin mi tam tak pawn chhuak thei loin an awm bawk a, National Guard chuan inchhunga tangkhangte chhanchhuah hna an thawk mek a ni.
Thlipui tleh vanga thi hriatchian tawhte hi Charlotte County chhim thlang lama mite an ni.
Florida state a thlen hmain kar tir lam khan Hurricane Ian hi Cuba ramah a tleh hmasa a, Thawhlehni khan an ram pumah power supply an nei lo a ni. Kar liam ta khan Puerto Rico-ah a lo tleh tawh bawk a, thlipui tlehin thil a tihchhiat hrang hrangte thenfai hna thawh mek a ni. September 18 khan Puerto Rico hian thlipui, Hurricane Fiona a lo tuar tawh bawk.