Chawngte NGO-in FIR an thehlut Kut inthlak a awm lo - College SU

Chawngte-a tlawmngai pawl hrang hrang intél khawm, Joint NGO chuan September 27, 2017-a Mizo Students' Union (MSU), Chawngte hruaitu ṭhenkhat, Chakma

ṭhalaite'n kut an thlak nia sawi chungchangah September 30, 2017 khan Chawngte Police Station-ah FIR an thehlut. Hetih lai hian, Kamalanagar College Students Union chuan, Chakma ṭhalaite'n MSU hruaitute kut an thlak lo niin an tarlang.

Chawngte Joint NGO chuan an FIR-ah hetiang hian an ziak a: "September 26, 2017, Thawhlehni khan Kamalanagar Higher Secondary School chuan sport neiin, he an sport neih lai hian Chakma ṭhenkhatte'n football practice tumin an tibuai a. Hemi chungchangah MSU hruaitute September 27, Nilainiah lungawi lohna lantir nan college student-te class kal lo tura ngenin college-ah an va kal a, an inngen mek laiin MSU hruaitute chu college staff pakhat, college student-te leh páwn lam eng emaw zatte'n kut an thlak a ni.

"Hei hi Joint NGO chuan a hrethiam lo tak zet a. Chu vang chuan, heng buaina siamtute hi he FIR kan rawn thehluh aṭanga ni hnih ral hma ngeia man chhuak tur leh unbailable-a case register kan duh a. He kan hun tiam chhunga thil tisualtute man chhuah an nih loh chuan, Joint NGO chuan anmahni man chhuak turin hma kan la dawn a, an chungah eng pawh thleng se anmahni mawh a ni ang," tiin.

FIR-ah hian YMA aṭangin Chawngte Group president B Engzuala, Chawngte Joint YMA president Lalsailova Hrahsel, Chawngte-P Branch president C Lalhmun­mawia, Chawngte-L Branch president PC Lalramnghaka te, YLA Chawngte-P branch president Omeg Lalramkinlova, Chawngte JAC chairman ZD Ramngamzauva, Chawngte MZP president Gospel Vanlalrinchhana leh Chawngte MSU president Vanlalropuia ten hming an ziak a ni.

Hetih lai hian, Kamalanagar College Students Union (KCSU) chuan September 30 vek khan thuchhuah an siam a, Chakma ṭhalaite'n Chawngte MSU hruaitute kut an thlak anga sawi chu thu dik lo hulhual a nih thu an tarlang.

KCSU tarlan danin, Kamalanagar College zirlaite chu internal test nei tura college-a an awm laiin Chawngte MSU hruaitute nia insawi mi ṭhenkhat chu class room-ah lutin, college gate khâr an tum a, college zirlaite'n thil awmzia an zawhfiah laiin Chawngte MSU President nia inchhál chuan an duh duh an tih theih thu sawiin, college zirlaite chu kut an thlak a ni.

KCSU chuan, thil thlen hnu lawkah Chawngte SDO (Civil), SDPO leh police dangte an thleng a, college zirtirtute leh zirlai hruai­tute nen thil awm dan an sawiho a, buaina chinfel a ni tih an sawi a, "Chawngte MSU-te hian MSU general headquarters lamah thu dik lo an hrilh a, social media-ah thu dik lo an thehdarh a, a vanduaithlak hle a ni," an ti.