Tuirial HEP October 2017-ah hawn tum a ni

Tuirial Hydro Electric Power project (HEP) chu hna thawh ngaite thawh zawh ṭep a ni a, tun thla (October) hian hawn hman beisei a ni.

Kawlphetha megawatt 60 pe chhuak thei tura ngaih Tuirial HEP hi September 29, 2017 khan Aizawla chanchinbu mite'n a hmunah an tlawh a, a dinhmunte chu Power & Electricity depart­ment hotute leh project viltu NEEPCO deputy general manager Dr Pradeep Saikia ten an hrilhfiah.

Dr Pradeep Saikia chuan, ngawrh takin hna an thawk mek tih sawiin, civil work an zo tawh a, khawl (turbine) pawh pakhat vuah tawhin, pakhat dang an vuah leh mek tih a sawi a; Tuirial lui khuah chu kawlphetha siam nan mai bakah, lawngleng hmanga inkalpawh nan te, sangha khawina atan leh state pawn lam aṭanga khualzin hîp nante hman ṭangkai theih a nih tur thu a sawi.

Pradeep Saikia sawi danin, Tuirial HEP siam nan hian cheng vbc. 1,400 vel sen a ni a, hun hma­sa lamah hna eng emaw chen thawh ni tawh mah se, harsatna a awm avangin tihtawp a ni. Kum 2011-ah Mizoram sorkarin tharthawh lehin, North Eastern Electric Power Corporation Ltd. (NEEPCO)-in an khawih a; NEEPCO hnuaiah hian Patel Engineering Ltd.-in civil work an thawk a, Bharat Heavy Elec­tricals Ltd. (BHEL)-in electrical work an khawih thung.

Tuirial HEP hi kawlphetha megawatt 60 pe chhuak thei tura ruahman a ni a, khawl (turbine) pahnih bun niin, kawlphetha megawatt 30 ve ve an siam chhuak thei tura ngaih a ni. Tuikhuah hian ram square km. 1,861 a chîm turah an ngai.

Tuirial HEP-in kawlphetha a pek chhuah aṭanga 12% (megawatt 8) chu Mizoramin a thlawnin a hmang thei dawn a, a bâk megawatt 52 (88%) pawh a duh chuan a lei vek thei dawn. Kawlphetha a pek chhuah chu unit khat Rs. 8.44 man tura chhût a ni.

Tun dinhmuna Mizoramin kawlphetha a mamawh san lai berin megawatt 84 vel a mamawh a, Tuirial HEP a puitling a nih chuan, Mizoram kawlphetha mamawh ang chu a phuhru thei dawn niin NEEPCO hotute chuan an sawi. Project hi kum 50 daih tura ruahman ni mah se, kum 50 aia tam a hman theih dawn niin an sawi bawk.