Nungcha, thing leh mau changchang zirho
Directorate of Science & Technology, Mizo Academy of Letters leh Pachhunga University College (PUC)-te chuan, September 29, 2017 tlai khan PUC-ah nungcha, thing leh mau thliar hran leh chhinchhiah chungchang zirhona, 'Seminar on Challengers in Bio-Systematics in Mizoram' an buatsaih a, chief minister Lal Thanhawla'n a hmanpui.
Chief Minister chuan, biodiversity-a Mizoram hausakzia tun hnaiah hriat chian a nih chauh thu sawiin, "Kum 20 chuang ram a buai chhung khan ram páwn lam mi, kan ram chhunga thil hlu chi hrang hrang - nauban váng ber chi, thingrái, ramhmul damdawite kawng hrang hranga dapin an ru chhuak nasa hle a, hlut leh humhalh nacháng hria kan awm mang lo," a ti.
Biodiversity hlâwkpuina tura hman ṭangkai dan zir kawngah tuna zirlai leh mithiamte tan hmalakna khua a la tlai loa a ngaih thu sawiin CM Hawla chuan, "Humhalh dan tur ruahmanna leh zirchianna neih a, district khawpui hrang hrangah ṭhangtharte hnenah ramdang mite'n kan thil hlu min rawk fo tawh lohna atan zirtirna pek a pawimawh," a ti a, biodiversity humhalh kawngah hian YMA an pawimawh thu a sawi.
Seminar-ah hian Mizorama rannung, thlai leh hnim hnah chi 30 khawvelin a la hriat chian loh leh chhinchhiah loh hmu chhuaktute zinga scientist 14-te chawimawina hlan a ni.