KHAWTHLIR

MPSC Chairman
Mizoram sorkar chuan Mizoram Public Service Commission (MPSC) chairman atan Rev. Zosangliana Colney a ruat. MPSC Chairman thar ruatna hi DPAR secretary V Lalremthanga'n a tichhuak. Rev. Zosangliana hi MPSC member ni lai a ni a, September 2017 tawpa chairman aṭanga chhuak ta PC Lawmkunga a thlak dawn a ni. Tun dinhmunah MPSC-ah hian chairman tih loh member dang an awm rih lo.

Thisen pe
Ramhlun Vengchhak Branch KṬP chuan, Inrinni khan an kohhran hall-ah blood donation camp an huaihawt a, mipa 21 leh hmeichhia pangate'n Synod Hospital tan thisen unit 26 an pe.

Zangnadawmna pe
Thorang bialtu MLA Zodintluanga chuan September 29-30, 2017 khan bial chhunga kumin fûr laia tui lian vanga thi chhungte hnenah sorkar aṭanga zangnadawmna a hlan. Zangnadawmna hi mi pakhatah Rs. 4,00,000 zel hlan a ni a; Changpui khuaah mi pahnih, Marpara-ah mi pathum leh Phairuangkaiah mi pali chhungte hnenah hlan a ni.

NDTv-ah Chief Minister
Vawiin chhun dar 11-12 inkar hian NDTv-ah chief minister Lal Thanhawla interview a chhuak dawn. NDTv hian CM Lal Thanhawla hi 'Dettol - NDTv Banega Swacch India XCampaign' programme-ah an kâwm a, state dang chief minister-te leh milâr dangte nen faina chungchang an sawiho a ni.

Jubilee lawm
Zuangtui High School chuan Inrinni khan an din champha kum 25-na, silver jubilee an lawm a, School Education minister H Rohluna'n hmanpuiin, bialtu MLA R Lalrinawma MLA fund aṭanga sak Zuangtui High School office thar a hawng nghal. Zuangtui H/S hi kum 1992-ah din a ni a, adhoc aided a ni. Office buiding hawn tak hi Rs. 5,79,413 sênga sak a ni.

Heroin man
Excise & Narcotics department chuan September 30, Inrinni zing dar 4:45 khan Keiṭum Kawnvengah heroin gram 28 leh a neitua puh JH Lalhmingthanga (27) s/o JH Lalhmangaiha, Ruantlang nia inchhál an man. A rual hian heroin gram 18 leh a neitua puh Vanlalrochhuanga (24) s/o Lalzuiliana, Falkawn nia inchhál an man bawk.