Zoram Titi-ah sorkar leh mipui Sum chungchang sawiho a ni
Vanglaini chuan October 1, Inrinni khan Music Home, Zonuamah Zoram Titi vawi 11-na an buatsaih a, sàwm bikte leh zirlaite telin, 'Sorkar sum leh mipui sum' tih thupui sawiho a ni.
Zoram Titi-ah hian Vanglaini joint editor Lalnghinglova Hmar-in Zoram Titi buatsaih chhan te, thupui atana hman ṭhinte a sawi a, chumi hnuah Vanglaini assistant general manager Zodingpuii kaihhruaiin titi ṭan a ni.
Thupui 'Sorkar sum leh mipui sum' tih chu sawiho turin point pathum siam a ni a; chungte chu - Mizoram sum leh pai dinhmun kan thlir dan, Covid-19 hripuiin Mizoram sum leh pai dinhmun a nghawng dan leh, Mizoram sum leh pai dinhmun siamṭhat theih dan tihte a ni.
Titi-ah hian thupui sawi tura sàwm zingah RL Rinawma, IRS (Rtd.), Mizoram University Economics department-a associate professor Dr James LT Thanga, MNF general secretary (Finance) PC Laldinthara, MPCC spokesperson Dr Lallianchhunga, ZPM PAC member TBC Lalvenchhunga leh PC president Vanlalruata te an tel a; Mizoram sum dinhmun leh a siamṭhat dan tura an hriat hrang hrangte an sawi.
Aizawl khawpuia college pariat - Pachhunga University College, Govt. Aizawl College, Hrangbana College, T Romana College, Aizawl West College, Aizawl North College, J Thankima College leh ICFAI University aṭangin zirlai pahnih ṭheuh an tel a; an ngaihdante an sawi bakah, zawhnate an zawt a ni.
Zoram Titi hi remchang hmasaah ZONET Cable TV leh Youtube kaltlangin mipui en theih tura tihchhuah a ni ang.
Vanglaini chanchinbu chuan kum 2011 aṭangin Zoram Titi a buatsaih ṭan a, Covid-19 lêng avangin kum 2020 leh 2021-ah buatsaih theih a nih loh hnuah, kuminah a vawi 11-na a buatsaih leh ta a ni.