Mizoramin thisen pe ṭha chawimawina dawng

National Voluntary Blood Donation Day - October 1 pualin September 17, 2022-ah India ram puma thisen pek rûnpui, Raktdaan Amrit Mahotsav huaihawt a ni a, Mizoram chuan thisen pe ṭha chawimawina October 1, Inrinni khan a dawng.

Raktdaan Amrit Mahotsav hi prime minister Narendra Modi-a'n New Delhi-ah a hawng a, Mizoramah pawh Health minister Dr R Lalthang­liana'n a hawng. September 17-ah hian Mizorama National Health Mission, Mizoram State AIDS Control Society, Association for Voluntary Blood Donation (AVBD) leh blood bank hrang hrangte'n thisen pek rûnpui an huaihawt a, thisen unit 346 pek a ni.

Raktdaan Amrit Mahotsav puala thisen pek huaihawtah hian MIzoram chu lawmman dawng tura thlan a ni a; October 1-a Jawahar Lal Nehru Auditorium, AIIMS-a National Voluntary Blood Donation Day hmannaah Mizoram aiawhin Dr Hming­thankimi, OSD, HFW department-in Union Health Minister hnen aṭangin award a dawng a ni.