Hmun hrang hrangah Faina Hapta ṭan

October 1, Inrinni khan Mizoram district hrang hrangah Faina Hapta, Mizoram Cleanliness Week vawi 46-na hawn a ni a, thupui chu 'Bawlhhlawh paih hmaa thliar hran' tih a ni.

Faina Hapta hi Lungleiah chuan additional DC Donny Lalruatsanga'n Convention Centre hall-ah a hawng a; hapta chhungin bawlhhlawh paih hmaa thliar hran chungchang inzirtirna, VC hnatlang leh in tina kala inzirtirna neih a ni dawn.

Siahaah chuan bawrhsap Lalsangliana'n a hawng a; bawlhhlawh paih hmaa thliar hran dan zirho niin, faina hnatlang beihpui thlak nghal a ni.

Champhai district bawrhsap James Lalrinchhana chuan CHANEM-ah Faina Hapta a hawng a; hapta pual hian mimal leh veng hrang hrangah an remchan dan angin faina hnatlang an nei. UDPA officer R Lalnunkimi'n bawlhhlawh thliar hran dan a zirtir bawk.

Kolasib-ah chuan bawrhsap John LT Sanga'n Kolasib Venglai YMA Park-ah Faina Hapta a hawnwg a, RTI Street Show neih a ni. Bawlhhlawh ṭawih thei leh thei lo bakah, hriselna atana hlauhawm bawlhhlawh paih dan entir a ni a, Swachh Toycathlon lawmman an sem nghal.

Lawngtlai DC Amol Srivastava chuan Chandmary Square-ah Faina Hapta a hawng a; Swachh Bharat Mission (Urban) brand ambassador K Lalenmawii'n a taka bawlhhlawh sawngbawl dan a zirtir a, Region Higher Secondary School NSS Unit te'n faina chungchang zirtirna lemchan an entir bawk.

Khawzawlah chuan bawrhsap CC Lalchhuangkima'n Zaingen Branch YMA Hall kawtah hapta a hawng a, khawpui chhung hmun hrang hrangah faina hnatlang neih nghal a ni.