Voluntary Blood Donation Day-ah thisen pek a ni

October 1, Inrinni kha National Voluntary Blood Donation Day a ni a, he ni pual hian AVBD, Hnahthial Branch chuan Hnahthial Model Branch YMA Inah thisen pek rûnpui huaihawtin, Christian Hospital, Serkawn tan thisen unit 25 an pe a, petute mipa 23 leh hmeichhia pahnih an ni.

Voluntary Blood Donation Day pual vêkin Khawzawl College NSS leh Khawzawl HSS NSS-te chuan Khawzawl College-ah Champhai District Hospital tan thisen unit 49 an pe a; Khawzawl College-in unit 25 leh Khawzawl HSS-in unit 24 an pe a ni.

National Voluntary Blood Donation Day hi MSACS leh Association for Voluntary Blood Donation huaihawtin vawiin hian Chanmari YMA Hall-ah hman a ni ang.

Inrinni vêk khan KṬP, Laipuitlang Branch-in Synod Hospital tan thisen unit 54 pein, petute mipa 39 leh hmeichhia 15 an ni a; KṬP, Model Veng Branch member mipa 28 leh hmeichhia pahnihte'n ZMC tan unit 30 an pe. KṬP, Chhiahtlang Kâwnveng Bial-in Serchhip District Hospital tan unit 27 pein, petute hmeichhia 14 leh mipa 13 an ni. PYD, Siaha Bial-in District Hospital tan unit 16 pein, petute mipa 15 leh hmeichhia pakhat an ni a; Lawngtlai AOC Bial LIKBK Ṭhalai Pawlin District Hospital tan unit 16 an pe a, Jorhat Mizo Welfare-te'n Greater Lion Blood Bank, Jorhat tan unit 16 an pe bawk.