Mizoramah Upate Ni hman a ni

October 1, Inrinni khan Mizoram hmun ṭhenkhatah Upate Ni hman a ni a, chief minister Zoramthanga leh ram hruaitu ṭhenkhatte'n an hmanpui.

CM Zoramthanga chuan Zemabawk North Area MUP-in Zemabawk North YMA Ina Upate Ni an hmanna a hmanpui a; upate hlutzia sawiin, "Upate kan nih hian Pathian malsawmna lallukhum kan khum nghal phawt mai a, kan vanneihzia leh a hlutzia hi kan hrethiam lo ang tih ka hlau ṭhin," a ti.

Zoramthanga chuan, páwn lam taksa awngrawp telh telh mah se, chhúng lam thlarau erawh chu ni tin siam tharin a awm tih chu a dik hle tih sawiin, "Upate'n kan tawnhriat leh finna kan chharte hi ṭhalai taksa la chak ṭhate hian han hmang ṭangkai thei se. Kan ṭhat lai, taksa a chak lai khan finna kan la nei tam tâwk lo a, thil kan ti pelh pheng phung ṭhin. Kum upat ang zelin finna leh thlarau nunah kan nghet tulh tulh ṭhin," a ti a; ṭhangthar zingah a changkang apiangin upate hlutna an ngai pawimawh tih a sawi.

Zemabawk North Area MUP-in Upate Ni an hmannaah hian an member thite sûnna hun hman a ni.

Minister of state Lalruatkima chuan Tuikual North MUP-in Upate Ni an hman a hmanpui. Lalruatkima chuan, upate chu mahni in chhung ṭheuha chhungkaw hotu ber, ṭhalaite finchhuaha kaihruaitu, ram leh hnam tana mi ṭangkai an nih thu a sawi a, "Kan upa tawlh tawlh a, kan hriatna a pung tial tial a, kan fing tawlh tawlh a ni,” a ti.

Lalruatkima hian Kanan Veng Presbyterian Kohhran Hall-ah Upate Ni a hmanpui bawk a; 'tar ât' tih ṭawngkam bo tawh se a duh thu sawiin, "Upate zah leh duat kawngah Mizote'n zir tur kan la ngah hlein ka hria," a ti a, Mizo khawtlang nun khaidingtu YMA, MHIP leh MUP a awm chu Mizo hnam tan a hlut tak zet thu a sawi.

Aizawl North-II bialtu MLA Dr Vanlalthlana chuan Ramhlun Sport Complex leh Ramthar North-ah Upate Ni a hmanpui a, "Kum upa zawkte hi kan ram tan hian in hlu a, chhungkua leh khawtlang tan in theih tâwk in lo tihte hi a ropuiin a hlu tak zet a ni,” a ti. MLA hian Ramhlun Sports Complex MUP hnenah lungphun siamna tur Rs 40,000 leh MLA fund aṭangin hna thawhna tur Rs 1,50,000 man a pe a; Ramthar North MUP hnenah MLA fund Rs 1,75,000 a pe tawh bawk.

Aizawl South-II bialtu MLA Lalchhuanthanga pawhin Tlangnuam MUP-in Tlangnuam community hall-ah Upate Ni a hmanpui a, "Sam ṭuak thlenga dam hi Pathian malsawmna a ni a, tar hnua thluak fím kan neih zel theih nan lehkha chhiar leh ṭhenrualte nena titia inkawm tam a ṭul," a ti.