Bangalore-ah Mizo Vangpui Kût hmang

Bangalore Mizo Association (BMA) chuan October 1, Inrinni khan Bangalore Mizo Vangpui Kût an hmang a, minister C Lalrinsanga chu khuallian niin, MP hlui Dr HT Sangliana, IPS (Rtd) chu kût pa a ni.

Minister C Lalrinsanga chuan, Mizoram chu ram intodelh lo a nih avangin intodelh turin theihtawp chhuah a ngaih thu sawiin, "Sorkar hnain min daih vek lo a, kutkawih eizawnna lamah hma kan sawn a, mahni kea ding tura zau zawka kan thlir zel a ngai," a ti.

Khawi hmunah pawh Mizo hnam leh ram hmasawn theihna tura theihtawp chhuah a ṭul thu sawiin C Lalrinsanga chuan, "Bangalore-a Mizote'n Mizoram House neih hlàn in nghahhlelhzia hriain a hmunhma ka tlawh tawh. Mizoram House in mamawhna thu hi Council of Ministers meeting-ah Chief Minister hnenah ka thlen tawh a, fund neih theih dan tur pawh CM nen Special Assistance to States for Capital Expenditure (SASCE) aṭanga ruahman dan tur kan sawi dun tawh," a ti a; Mizoram House sakna tur ruahman thuai a nih a beisei thu a sawi.

BMA president Lawmna Kima’n tarlan danin, Bangalore-ah Mizote kum 70 chuang an awm tawh a, tunah Mizo 3,000 chuang an awm mek. Kum 2015 khan Mizoram House sakna tur ram lei tawh a ni.