Covid-19 vei enkawl lai mi 122 an awm

Mizoramah Covid-19 vei September 30, Zirtawpni khan mi 10 leh October 1, Inrinni khan mi 12 hmuh chhuah a ni a, hripui vei dam tawh Inrinni khan mi 28 leh nimin khan 17 chhuahtir niin, hripui vanga thi an awm lo. Covid-19 vei enkawl mek mi 122 chiah an awm.

September 30-a Covid-19 positive hmuh thar mi 10-te chu RAT hmanga hmuh chhuah vek an ni a, Lunglei district-ah mi paruk, Serchhipah pahnih leh Mamit leh Hnahthialah mi pakhat hmuh chhuah a ni. Swab sample 228 endik aṭanga positive hmuh zat chu 4.39% a ni.

October 1, Inrinnia hripui vei hmuh thar mi 12-te chu RAT hmanga hmuh chhuah vek an ni a, Aizawl leh Lunglei district-ah mi pali ve ve, Mamitah pathum leh Saitualah mi pakhat hmuh chhuah a ni. Sample 170 endik aṭanga positive rate chu 7.06% a ni.

IDSP record angin, Mizoramah Covid-19 vei 2,38,458 hmuh chhuah a ni tawh a, nimin tlai dar 5 thlengin mi 2,37,613 (99.65%) chhuahtir an ni tawh a, mi 723 (0.30%) thi tawhin, enkawl mek mi 122 (0.05%) an awm.

Nimin tlai dinhmun angin, Siaha, Champhai leh Lawngtlai district-ah Covid-19 vei enkawl lai an awm tawh rih lo a; active case tamna ber Aizawl district-ah mi 42 an awm a ni.