September 2022-ah hripui vei 1,268, Chhuahtir 1,663, thihpui 1 an awm

Kumin September thla chhung khan Mizoramah Covid-19 vei mi 1,268 hmuh chhuah a ni a, August 2022-a hmuh chhuah 4,378 aiin 3,110-in a tlem zawk. Hripui vei dam tawh mi 1,663 chhuahtir an ni a, hripui vangin mi pakhat chiah a thi.

IDSP, Mizoram chhin-chhiah danin, September 2022 chhunga Covid-19 positive hmuh chhuah mi 1,268 chu chawhrualin ni tin mi 42.26 chuang hret (42.26) an awm ang a ni a, August-ah chuan mi 141 chuang hret awm ang a ni thung.

September thlaa positivity rate chawhrual chu 10.19% a ni a, August thlaa positivity rate 22.82% aiin a hniam zawk hle. Swab sample 10,476 endik a ni a, August thlaa endik 19,181 aiin 8,705-in a tlem zawk. Hripui vei dam tawh September thlaa chhuahtir zat chu mi 1,663 an ni a, positive hmuh zat 1,268 aiin 395-in a tam zawk. September chhung vêkin Covid-19 vei zinga mi pakhat chiah a thi a, kumina thi an tlem ber thla a ni.

Kumin 2022-ah January aṭanga September thla thlengin swab sample 4,75,772 endik niin, chu'ng zinga mi 96,781 chu Covid-19 positive an ni a; hripui vei dama chhuahtir mi 98,087 an awm laiin, mi 178 an thi tawh thung.