Faina Hapta 2017 hman ṭan a ni ; Mizorama khawpui fai ber Biate

India hnampa, Mahatma Gandhi pian champhaa neih ṭan ṭhin Faina Hapta chu nimin zing khan Lammualah UDPA minister Zodintluanga'n a hawng a; Mizorama khawpui fai berah Biate thlan a nih thu puangin, lawmman a hlan.

UDPA Minister chuan, kum 1977 aṭanga Faina Hapta a hman ṭan a nih thu sawiin, Mizote chu faina leh thianghlimna kawngah hma an sâwn hlea a hriat thu a sawi a; kum 40 chhung Faina Hapta/Cleanliness Week lo hman tawh chu duh tâwk mai loin, kumin aṭangin Cleanliness Year hman a nih dawn thu sawiin, Cleanliness Year chu a hawng nghal.

Cleanliness Year hian October 2, 2017 aṭanga October 1, 2018 thleng a huam dawn a; chumi chhung chuan faina kawngah Mizoram dung leh vangah sorkarin kum khat daih tur action plan a duang a ni.

Zodintluanga chuan, faina kawnga ṭan lak tharna atana sorkarin kumina khawpui fai inelna a buatsaih chu a hlawhtling hlea a hriat thu sawiin, "Faina kawnga Mizo inthurualzia a tilang. Mizoram urban area-ah chuan kum tin khaw fai inelna hi buatsaih chhunzawm zel a ni dawn," a ti.

Mizoram chu hmarchhak state zingah páwn lama inthiar awm lohna, open defecation free (ODF) hmasa ber nih tuma hmalak a nih mek laiin, Sikkim-in hmakhalh mah se, pahnihna ni turin theihtawp chhuah a nih thu sawiin Zodintluanga chuan, "India ramah state fai ber nih kan tum a ni," a ti a; Mizoram Municipalities (3rd Amendment) Act, 2015 angin, Aizawl chu Littering Free Zone-ah puan a ni a, khawlaia bawlhhlawh paihte chu pawisa chawitir zel an nih dawn thu leh, hei hi November 2017 aṭanga kenkawh tur a nih thu a sawi.

UPDA Minister hian Mizorama khawpui (census notified town) 23-te fainaa an inelnaa ti ṭhate lawmman a hlan a; Mizorama khawpui fai ber chu Biate a ni a, Hnahthial chu pahnihna niin, Mamit chu pathumna a ni.

Khawpui fai thlannaah hian Category-I ah district headquarters-te an awm a, Category-II ah khawpui dang 15 an awm. Category-I a pakhatna chu Mamit a ni a, Lunglei leh Champhai-in an dawt. Category-II ah Biate pakhatna an ni a, Hnahthial leh Saitual-in an dawt.

Category I leh II-ah hian pakhatnain Rs. 1,00,000, pahnihnain Rs. 50,000 leh pathumnain Rs. 30,000 an dawng a; a bâk zawngin consolation prize Rs. 5,000 ṭheuh an dawng. Overall-a lawmman dawngtute'n a hranpain certificate an dawng bawk.

Faina Hapta hawnnaah hian Aizawl mayor PC Lalhmingthanga leh AMC councillor te, UDPA secretary Dr C Vanlalramsanga te, NSS, NCC, Scout & Guide hruaitute leh volunteer-te an tel a; inkhawm ṭan hmain Lammual leh a chhehvel an tifai a ni.