Chawngte NGO-te'n FIR an hnûkdâwk

Tun hnaia Mizo Students' Union (MSU) head quarters, Chawngte hruaitu ṭhenkhatte Chakma ṭhalaite'n kut an thlak nia sawi chungchanga Chawngte-a tlawmngai pawl (NGO) hrang hrangin September 30, 2017-a Chawngte Police Station-a FIR an thehluhah MSU tih loh pawl dang zawng chu an inhnûkdâwk.

Tarlan tawh angin, Chawngte MSU hruaitu ṭhen­khat chu Chakma ṭhalai­te'n kut an thlak nia sawi chungchangah hian Chawngte-a NGO hrang hrang Chawngte Group YMA, Chawngte Joint YMA, Chawngte-P Branch YMA, Chawngte-L Branch YMA, Chawngte-P YLA, Chawngte JAC, Chawngte MZP leh Chawngte MSU-te'n September 30 khan Chawngte PS-ah FIR an thehlut a ni.

Joint NGO hian FIR-ah hian, MSU hruaitu kut thlaktute chu FIR an thehluh aṭanga ni hnih ral hma (October 3 ral hma)-a man chhuak tur leh unbailable-a case ziah lut turin an phût tih an ziak a; an hun tiam chhunga man an nih loh chuan Joint NGO-in man chhuak tura hmalak an tum thu an tarlang.

FIR thehluhnaa tel NGO zinga MSU tih loh pawl dang zawng aiawh, FIR-a hming ziaktute chuan Octo­ber 1, Pathianni khan Chawngte PS Officer-in-Charge hnenah lehkha an thehlut leh a; FIR aṭanga an inhnuhdawh thu an hriattir a ni.

October 1-a NGO dang­te'n lehkha an thehluhah chuan, "Dr. 30.9.2017 nia Chawngte Joint NGO hminga FIR kan lo thehluh kha ngun taka kan ngaihtuah hnuin, heng a hnuaia hming ziaktute hian kaltlangpui loh mai ni se kan ti a, FIR withdraw kan rawn dil che a ni," tiin an ziak.

FIR hnuhdawh dilnaa hming ziaktute chu - Chawngte JAC chairman ZD Ramngamzauva, Chawngte Group president B Engzuala, Chawngte Joint YMA president Lalsailova Hrahsel, Chawngte-P Branch president C Lalhmunmawia, Chawngte-L Branch president PC Lalramnghaka te, YLA Chawngte-P branch president Omeg Lalramkinlova leh Chawngte MZP president Gospel Vanlalrinchhana te an ni.

September 28, 2017-a MSU general headquarters press release chuan, September 26, 2017-a Chawngte HSS Sport lai Chakma ṭhalaiin an tihbuai thu te, Chawngte MSU hruaitute'n thil awmzia hriat tum leh boruak ṭha a awm theih nana hma an laknaah Chakma ṭhalai 200 rualin Chawngte MSU hruaitute kut an thlak thute an tarlang. MSU hruaitute kut thlaktute chu mana hrem an phût thu te, kut tuartute hnenah zangnadawmna pe tura Chakma Autonomous District Council an phût thute an ziak.

Chawngte MSU hruai­tute Chakma ṭhalaite'n kut an thlak nia sawi avang hian MSU Gen.Hqrs. hruaitu ṭhenkhat chu September 28 tlai khan Hunthar Venga Chakma House-ah kal­in, bungraw ṭhenkhat an tichhia a; mikhual thleng zawng zawng (damlo tih loh)-te chu chhuak turin an ti a ni. September 29 khan Vanapa Hall kawt aṭanga Chakma House chhak thleng kawng an zawh bawk.

Hetih lai hian, Chawngte-a zirtirtu pakhat (Mizo) chuan, Chawngte MSU hruaitu ṭhenkhat chu Kamalanagar College-ah zirlaite dan tumin an kal ngei thu a sawi rualin, Chakma ṭhalaite'n kut an thlâk an hriat loh thu Vanglaini palai a hrilh.