District tinah Faina Hapta hawn a ni

Nimin khan Mizoram hmun hrang hrangah Faina Hapta hman ṭan a ni a, district khawpuiah chuan district bawrhsapte leh sorkar hotute'n an hmanpui. Hapta pual hian faina hnatlang neih a ni hlawm.

Faina Hapta hi Lungleiah chuan UDPA office kawtah hawn niin, DC Lalzarmawii'n a hawng. DC chuan, khawpui fai inelnaah khawtlang ṭheuhah mipui thinlunga faina tuh a pawimawh thu a sawi a, "Lawmman la tur ringawta fai kan tum tur a ni lo a, kumtluana kan fai a pawimawh. Mipuite rilruah faina kan tuh a ngai a, faina hi hriselna nena inzawm tlat a nih avangin mi tinte'n faina kawngah rilru kan siam thar a ngai," a ti.

Faina Hapta hawnnaah hian sorkar official, YMA, MJA, Clean Lunglei leh college zirlaite an tel a, a hawnna hmun aṭangin DC bangla thleng kawng an zawh a ni.

Siahaah chuan DC Conference Hall-ah Faina Hapta hawn a ni a, MADC-a executive member (LAD) MH Tiabi chu khuallian niin, DC Harleen Kaur chu khualzahawm a ni. MH Tiabi chuan, faina tluantling leh kumhlun nei turin rilru lama faina neih hmasak phawt a ngaih thu a sawi.

Siahaah hian Hapta pualin faina inelna buatsaih a ni a; veng fai berah ECM Veng, sorkar pisa fai berah DRDA Office, sikul fai berah Meisavaih P/S, Best Editorial of Cleanliness-ah The Times of Maraland, eatery/canteen/restaurant-ah Hudson Restaurant-te thlan a ni. Pakhatnate'n Rs. 2,000, pahnihnate'n Rs. 1,500 leh pathumnate'n Rs. 500 an dawng.

Faina Hapta hawnna inkhawm hi Champhaia chuan CHANEM tualah neih a ni a, DRDA project director Zosangzuali Pachuau-in hawngin, Faina Hapta puala hnatlangte a vailiam.

Lalsangzuali Pachuau chuan, faina inzirtirna leh nunpuina chu hapta khat chhung chauh ni loin, kumtluana hmang ṭhin turin kalkhawmte chu a chah a, "Khua leh tui ṭha ni tur chuan mahni invawnfai bakah, khawtlang bungrua leh hmunhmáte vawn fai a ngai a ni," a ti.

Champhaiah hian Faina Hapta pual­in inelna buatsaih a ni dawn a; sorkar pisa, zirna in leh veng fai thlan tur niin, lawmman hlan a ni ang.

Serchhipah chuan zing dar 7-ah Serchhip Bazarah a hawnna inkhawm hman a ni a, deputy DC Chuauhnuna khuallian a ni. Faina Hapta pualin zirlaite'n kawng an zawh a, faina thutiam neia au rual. Chuauhnuna chuan, faina kawnga theih­tawp chhuah a ṭul thu leh thinglungah faina tuh ngheh a ngaih thu a sawi.

Serchhipa UDPA officer Vanthangpuii sawi danin, Serchhipah hian kum 2003-ah Faina Hapta hman ṭan a ni a, Hapta pualin veng fai inelna neih a ni dawn. Hapta hawnnaah hian sorkar department hrang hrang aiawhte leh zirlai ṭhahnem tak an tel a ni.

Lawngtlaiah chuan Areopagy-ah Lawngtlai DC Dr Arun T-in Faina Hapta a hawng. DC chuan, faina kawnga hmalak chu mi tin mawhphurhna a ni tih sawiin, "Mahni in leh a vel bakah, khawtlang vawn fai te, bawlhhlawh thliar hran leh a paihna hmun chauha paih hi awlsam têa fai theihna kawng a ni a, faina avangin natna 80% vel chu pumpelh theih a ni," a ti.

Faina Hapta hawn inkhawm zawhah Lawngtlaia state sorkar leh LADC sorkara thawk, tlawmngai pawl leh sikul naupangte chu hmun paliah inṭhenin, Lawngtlai khawpui chhung kawngpui dunga bawlhhlawhte an thian fai a ni.

Mamitah chuan Charkawnah additional DC H Lianzela'n Faina Hapta a hawng. H Lianzela chuan, faina leh thianghlimna kawngah India ramin nasa takin hma a la a, Mamit district chu pawn lama inthiar awm lohna, open defecation free (ODF) ni tura kalpuinaah India ram pumah tuam (cover) zau bera thlan an nih thu a sawiin, mipuite chu tifaitu an nih theih loh pawhin, a tibawlh­hlawhtu ni lo turin a chah.

Inkhawmah hian Mamit district tana faina lam hawia intihsiakna (Swach Sankalp Se Swachh Siddhi) essay competition, short film competition leh painting competion-a ti ṭhate hnenah lawmman sem a ni a; Mamit khawpui veng hrang hrang aṭanga faina hnatlanga telte aṭanga slogan inziahsiaka lawmman sem a ni bawk. Mamitah hian Faina Hapta chhungin veng, sikul leh hotel/restaurant fai ber thlan a ni ang.