PRISM-in hnam chhan ngam loah CM Hawla puh

PRISM chuan chief minister Lal Thanhawla chu hnam chhan ngam loah puhin, "Bangladesh aṭanga a sing téla lo lut rute India khua leh tuia chhála pawm thiam an ṭulzia tlangaupuitu hi ram hruai reng tlakah kan ngai lo," an ti.

Bangladesh aṭangin Mizoramah Chakma tam tak an lut ru tih chhiarpui aṭangin a chiang nia sawiin PRISM thuchhuah chuan, "Chutih laiin, ramri vengtu Border Security Force (BSF) chuan lut rû awm lo angin an report tlat a ni," a ti a; CM Lal Thanhawla'n Chakma-te India khua leh tuia pawm thiam a ṭul thu a sawi chu hnam phatsannaa an ngaih thu a tarlang.

PRISM chuan, minister KS Thanga'n kum 2014-15, 2015-16 leh 2016-17 chhunga a MLA fund zinga 35.38% chu dan kalhin a hmang niin an sawi a, "Fund hman tur Rs. 1,80,00,000 a awm laiin, RTI At hmanga lak document-ah chuan Rs. 1,67,32,500.00 (92.95%) chiah pawisa hman a ni a, Rs. 12,67,500 (7.04%) chu a chin kan hre thei lo," an ti a; chhui chian zui tlaka an ngaih thu an sawi.

PRISM tarlan dan­in, KS Thanga hian a bial chhung ni lo khaw pathumah a MLALAD fund zinga Rs. 2,55,500 a hmang a, chutih laiin, a bial chhunga Chamring khuaah chuan cheng khat mah a hmang lo. A bial chhung khaw 27 zinga khaw pangain cheng nuai 10 an dawn tling a, guidelines kalhin Floria Glamour-in Rs. 11,55,000 leh Zothan Auto Works-in Rs. 10,00,000 an dawng. Guidelines kalhin pawl mal ta tur thil siam nan hna 12, Rs. 7,90,000 hmangin thawh a ni a, guidelines kalh vekin hna 26-ah Rs. 9,50,000 hman a ni bawk.

Hna thawh 130 zinga 46 (35.38%) chu guide­lines kalh a ni a, chuta sum hman chu Rs. 41,50,500 niin, chu chu sum hmanna hriat theih chin aṭangin 24.80% a ni.