NDTV-ah Chief Minister-in faina thu a sawi

Chief minister Lal Thanhawla chu nimin chhun dar 11-12 inkar khan India rama news channel lâr, NDTV-in kâwmin, live-in an tichhuak a, faina kawnga Mizoramin a ngaih pawimawh leh hma a lak dante a sawi.

CM Lal Thanhawla chuan, Mizote chu tlawmngaihna nunpuitu an ni tih sawiin, "Mi dangte ṭanpui duhna leh vantlang tana inpekna thûk nei kan ni a, mi lian leh tê zawng zawng telin vantlang tan hnatlangin kan thawk ṭhin. "Tun hma aṭangin Faina Hapta hmangin faina kawnga hmalakna hrang hrang sorkar leh khawtlangin kan thawk a, tuna Prime Minister hmalakna, Swacchta Hi Seva campaign pawh Mizoram aia hre chiang an awm kher lo ang. Theihtawp chhuah zel kan tum a, nakin lawkah chuan state ṭha ber ni turin beiseina kan nei a ni," a ti.

NDTV live discussion - NDTV Cleanathon Season-4 hi NDTV network hnuaia channel zawng zawngah live telecast-a pek chhuah a ni. Senior anchor Vikram Chandra-a'n NDTV studio aṭanga kaihruaiin, special guest angin filmstar lâr Amitabh Bachchan, Cleanathon brand ambassador-in a ṭhutpui a; PM Pu Narendra Modi, state chief minister-te leh milarte'n faina kawnga hmalakna chungchang an sawiho a ni.