Khawvel Upate Ni hman a ni

Nimin khan Mission Vengthlang leh Hualtu khuaah Upate Ni hman a ni. Mission Vengthlang MUP-in Synod Multipurpose Training Centre-a Upate Ni an hman chu minister Lalsawta'n a hmanpui a, Hualtu MUP-te chu MLA Lalrinawma'n a hmanpui.

Minister Lalsawta chuan, upate chu an hlutzia leh ṭangkaizia hriaa, tawnhriat tam tak an neih tawh aṭanga ṭhalaite fin­chhuah ṭhin turin a chah a, "Upate hi khaw­tlang rohlu an ni a, anmahni ṭanpui leh ngaihsak chu kum lama naupang zawkte mawhphurhna a ni. An dam hun chawhnu her lam tawh pawh hlim takin kan siam thei a ni," a ti. Minister hian kum 90 tling mi 14 hnenah chawimawina a hlan a ni.

Hualtu MUP-in Upate Ni an hmannaa khuallian Lalrinawma, MLA chuan, "Kan ram ṭhanmawhbâwk chu ram leh hnam neitu tak tak thinlung kan pu ṭhin lo hi a ni," a ti a; Upate Ni hmannaa tel zawng zawngte chu an tu leh fate leh ṭhangthar lo awm zel turte hnenah ram leh hnam neitu thinlung tuh zel turin a chah.

Khawvel Upate Ni hi United Nations chuan December 14, 1990 khan kum tin October 1-a hman turin a ruat a, India ramah chuan kum 1999 aṭang khan hman ṭan niin, Mizoramah pawh 1999-ah hman ṭan a ni. Kuminah chuan October 1 hi Pathian­ni a nih avangin nimin khan an hmang a ni.