ZNP-in CM thusawi pawi an ti

ZNP office bearer-te chu nimin khan an president Lalduhoma hoin an party pisaah an ṭhukhawm a; resolution pass in, Chakma-te laka Mizo mipui ṭanrual a ṭul em em laia Chief Minister berin Chakma thlavâng hauha ngaih theih zawnga a la ṭawng zel chu pawi an tih thu an tarlang.

ZNP hruaitute resolution chuan, "Tun dinhmunah Chakma-te laka Mizo mipui ṭanrual a ṭul em em laia kan Chief Minister berin Chakma thlavang hauha ngaih theih zawnga a la ṭawng zui zel hi pawi kan ti a. Chakma chungchanga Ex-MNA in thuchhuah an siam leh an rilru ná hi âwm kan tiin kan ṭâwmpui hle a ni," an ti.

Dik lo taka Mizorama pém lut (illegal migrant) Chakma chungchangah ZNP chu an dinna ngaiah an la ding reng tih sawiin ZNP resolution chuan, political party zawng zawng leh NGO-te'n lungrual taka hmalak ni se, chutah chuan Mizoram sorkar chu hmahruaitu ni se tih chu an dinna a la nih reng thu a tarlang.

ZNP chuan, kum 30 chuang sorkar ding tawh leh ding mekah mipui an beidawn mek laia beidawngte beiseina thar neihtirtu atana Zoram Peoples’ Movement (Ṭangrual Pawl) a ding ta chu lawmawm an tih thu an sawi a, "Anni pawh sorkar se eng an ni chuang lo ang, tia lo beidawng tawh zawng zawngte beidawng mai lo tur leh, thawhhona huanga lo tel vek turin tih tak zetin kan sáwm a ni," an ti.