KHAWTHLIR

Medical camp
PWD, Aizawl Road South Division chuan Mahatma Gandhi pian champha pualin nimin khan Salem Venga an site office-ah hna thawka an chhawrte tan Medical Screening Camp an buatsaih a, Grace Nursing Hospital aṭangin doctor leh thawktu dangte'n an hriselna dinhmun an enfiah. PWD Aizawl Road South Division-ah sub-division pali awmin, labour 100 chuang an awm a, kawng km. 190-a sei an enkawl mek a ni.

Thisen pe
BCM Lawngtlai South bial ṬKP chuan National Voluntary Blood Donation Day pualin Inrinni khan Lawngtlai District Hospital tan thisen unit 47 an pe a, a petute mipa vek an ni.

Lawmman hlan
Ministry of Drinking Water and Sanitation thu anga India ram puma Swachh Bharat Abhiyan Mass Awareness (Faina chungchanga mipuite hrilhzauna) hnuaia August 16 - September 8, 2017 chhunga Essay Competition leh Painting Competition buatsaiha ti ṭhate hnenah nimin khan Lunglei DC Lalzarmawii'n a pisaah lawmman a hlan.

Painting exhibition
IPR department leh Mizoram Art Development Society (MADS) bultuma Vanlalhriata'n Aizawl Art Gallery-a 3rd. Solo Painting Exhibition a buatsaih chu nimin khan PCCF Lalram Thanga'n a hawng. Exhibitiion-ah hian lemziak 30 chuang pho chhuah a ni a, October 7 thleng a awh ang.

Tanpuina pe
Japan leh Singapore a Zomi-te chuan Zomi Innkuan, Aizawl kaltlangin an pawisa thawhkhawm Rs. 29,760 chu nimin khan Mizorama tuilian avanga harsatna tawkte ṭanpuina atan Central YMA general secretary Lalhmachhuana hnenah an hlan.

Campaign khar
Ram pum huap faina campaign 'Swachhata Hi Seva' chu nimin khan Aijal Club-ah khar a ni a, PHE secretary V Lalremthanga'n a hman pui. Inkhawmah hian campaign neih chhung September 15 aṭanga October 2 chhunga khawi fai thlannaa ti ṭhate hnenah lawmman sem a ni.