Rickie Lambert a chawl ta
England international hlui Rickie Lambert chuan inkhelh a chawlhsan thu a puang. Kum 35 mi striker hian footballer a nih laia a hun duhawm bera chhal ngam chu Southampton-ah a hmang a, Premier League club zingah Liverpool leh West Brom tan a inlan tawh bawk.
Three Lions (England sawina) tan vawi 11 inlana goal thum khungtu striker chuan, "He infiamna huang chhunga hei leh chen hun ka hmang thei hi ka lawm takzet a, ka career-ah khan hlimna leh lungngaihna inchhawk ve reng mah se club ropui Southampton, Liverpool leh World Cup-ah kan ram tana ka inlan theite kha ka mang ramah pawh kan mang phak ngai loh thil a ni. England kawr ka hak kha professional ka nih chhung zawnga ka hlim lai ber a ni a, ka hun tawng tura ka zinkawng hlimawm te kha ka thlir let fo ṭhin ang," tiin a chawlh thu hi a puang.
Saints legend tia chhal ngam striker chuan, "Club ka lo khelh tawhna zawng zawnga fan-te chungah lawmthu ka sawi a, a bik takin footballer ka nihna anga ka hun duhawm ber ka hmanna Southampton fan-te chungah lawmthu ka sawi. Player ka khelhpui leh manager ka thawhpui tawhte zawng zawng chungah lawmthu ka sawi a, nangni nena thawhho kha a nuam em em a ni," a ti.
Liverpool youth system chhuak hian second division-ah Blackpool aṭangin a zinkawng a zawh ṭan a, Macclesfield Town, Stockport County, Rochdale, Bristol Rovers, Southampton, Liverpool, West Brom leh Cardiff City tan a khel. Saints-ah hian League One aṭanga Premier League an inhlankai thlengin player pawimawh pawl a ni a, Championship player of the year-ah vawi khat thlan niin Southampton player of the year-ah vawi hnih thlan a ni bawk.