City Centre sak tur sawiho

Chief minister Lal Thanhawla hoin nimin khan Cabinet meeting room-ah Aizawl City Centre sak tur leh Kawr­puichhuaha Integrated Check Post (ICP) din dan tur sawiho a ni.

Meeting-ah hian Aizawl New Market-a Aizawl City Centre Annexe sakna tura ruahmanna hrang hrangte sawiho a ni a; Foreign Lane leh Land Revenue & Settlement department quarters eng emaw zat awmnaah sak tura rawt a ni. City Centre hi NEDP hnuaia sumdawnna hmunpui leh thianghlim tak ni tura ruahman a ni a, sak chhungin a nghawng tur chin dawrkaite awm lailâwkna atan a bul hnaia market building sak mek chu hman theih an beisei.

Bangladesh nen ramri insumdawntawnna atan hmun pawimawh tur, Kawrpuichhuaha Integrated Check Post (ICP) din tur chung­changah Chief Minister chuan, Bangladesh pawhin insumdawn tawnna tura hmalakna chu an phûrpui thu leh nasa taka hma an lak thu a sawi a, "Hemi kawng­ah hian Mizoram lam pawhin theihtawp chhuah ve a ṭul a ni," a ti.

Bangladesh lama official-te leh Mizoram Commerce & Industries department chuan ram­riah joint inspection an nei tawh a; meeting-ah hian harsatna tawh ṭhenkhatte leh hmalak dan turte sawi a ni.

Meeting-ah hian LRS minister R Romawia, Finance minister Lal­sawta, Industries minister H Rohluna bakah, sorkar official-te an tel.