Voluntary Blood Donation Day hman a ni

Mizoram States AIDS Control Society (MSACS) leh Association for Voluntary Blood Donation (AVBD) huaihawtin, nimin khan Aizawl, Lunglei leh Serchhipahte National Voluntary Blood Donation Day hman a ni a, mi 239-in thisen an pe.

Aizawlah chuan Voluntary Blood Donation Day hi MSACS leh AVBD bakah, J Thankima College NSS huaihawtin J Thankima College-ah hman a ni a, Health principal director D F Lallianhlira khuallian a ni.

Khuallian chuan, Mizote chu thisen pekah an harh tial tial tih sawiin, lawmawm a tih thu a sawi a, "A thlawna thisen pek a pun zel theih nan ṭan i la zel ang u. Thisen pe thei turin life style ngaih pawimawh a ngai a, mahni inthunun a ngai," a ti.

AVBD general secretary C Lalnun­nema sawi danin, Mizoramah a thlawna thisen pek hi kum 1993-ah a awm ṭan a, chumi kum chuan voluntary donation chu 1.79% chauh a ni. Tunah chuan voluntary donation hi 80% chuang a ni tawh a, eng emaw lai phei chuan 90% chung lamte a ni ṭhin.

Kum 2016-17 financial year chhunga thisen pek zawng zawng chu unit 25,895 a ni a, voluntary dona­tion chu 83% a ni. Pawl hrang hrangte thisen pek zat chu - kohhran

ṭhalai hminga pek zat unit 8,416, zirna-inte'n an pek zat unit 3,986, YMA-in an pek zat unit 1,988, pawl dang hrang hrang pek zat unit 2,308 leh mimala pe (individual donor) unit 5,140 a ni.

Inkhawmah hian MSACS project director Dr Lalmalsawmi Sailo leh J Thankima College principal Dr C Lalremruata te pawhin thu an sawi. Hawnna inkhawm zawhah J Thankima College zirlaite'n thisen an pe nghal a, mipa 127 leh hmeichhia 31-te'n Aizawl Civil Hospital tan thisen unit 158 an pe.

Lungleiah pawh MSACS leh AVBD bultumin Lunglei Civil Hospital leh Lunglei Higher Secondary School-te'n Lunglei HSS-ah an hmang a; hawnna inkhawm zawhah donation camp huaihawt niin, mipa 32 leh hmeichhia 26-te'n Lunglei Civil Hospital tan thisen unit 58 an pe a ni.

Serchhipah chuan Serchhip District Hospital (JN Hospital) leh AVBD Serchhip Branch huaihawtin hman a ni. Serchhip AVBD vice president Zolianmawia chuan, tun hma lamin JN Hospital-a damlote'n thla khata thisen an mamawh chu unit 35 vela ngaih a ni a, tunah erawh chuan damdawi-in tihchangtlun zel a nih avangin thisen mamawh zat a pung hle tawh tih a sawi. Voluntary Blood Donation Day-ah hian Serchhip Darnam Branch chuan thise unit 33 an pe a, a petute mipa 26 leh hmeichhia pasarih an ni.

National Voluntary Blood Donation Day hi October 1 a ni a, kuminah Pathianni-ah a tlak avangin nimin khan hman a ni.