63rd. National Wildlife Week hawng

October 1-7 chhung awh tur, 63rd. National Wildlife Week, 2017 chu nimin khan Assembly Annexe conference hall-ah chief minister Lal Thanhawla'n a hawng. Wildlife Week hi district tina hman tura ruahman a ni a, thupui chu 'Nungcha humhalhna kawnga mipui tel vena' tih a ni.

Chief Minister chuan, tlangram lo neih, ramngaw hlutna hriat loh vang leh nungchate chunga rilru put dan dik tawk loh vangin ramngaw leh nungcha humhalh kawnga hmalakna chu Mizoramah a sak hle tih a sawi a, "Ramngaw dik tak 1% pawh awm tawh lohnaah hian nungcha humhalh leh nungchate chenna tur ramngaw siamṭhat lehna kawngah mawhphurhna pek kan ni," a ti.

Zahna leh inthlahrunna nei miah loa sapêl, silai pûa ramvâk hmuh tur an awm chu rilru nat thlak a tih thu sawiin CM Hawla chuan, "Lo, huan thlai ven nan leh mahni inhumhimna atana silai license dilte'n an dilna mil loa silai chelek a, dan an bawhchhiat avangin nunna chán an awm ṭhin hi a pawi hle," a ti a; silai neite nasa zawka khuahkhirh dan dap ṭha a tih thu a sawi.

Lal Thanhawla chuan, Mizoram chu thlai, ramhmul chi hrang hrang leh rannung, thil nung chi tinrengte hmun dang zawng aia a tamna hmun niin mithiamte'n an sawi thu sawiin, "Mizoram chhunga ramngaw la awmte hi nasa taka humhalh ngai leh ven ngai a ni," a ti.

Tun hnai lawk thleng pawhin khaw­chhak lam aṭanga rawn lut rute'n ramngaw hauhsakna an rawk leh tih hriat a nih thu sawiin Chief Minister chuan, "Tihtawp a nih theih nan Zoram mipuite ṭanrual a ngai a, kan rama thil hlu humhalh awmte pawh ka hmelhriat a ngai," a ti a; hnim hnahte pawh a ṭul loah hâl ral mai mai loa duat zir a pawimawh thu a sawi.

Inkhawmah hian Padma Shri awardee Dr C Lalhmingliana'n 'Pathian hridai theu kan ṭhiat' tih thupui a sawi.

Inkhawma tarlan danin, April 2016 leh September 2017 inkar khan Mizoramah ramsa seh leh beih tawk mi 41 an awm a; chu'ng zinga mi parukin nunna an chán a, mi 35 an hliam. Nunna chán mi paruk zingah savawm seh pakhat, rúl chuk pali leh khuai seh pakhat an awm a; nunna chánte chu Rs. 2,00, 000-a ràl an ni.

Wildlife Protection Act 1972 hmanga ramsa tihlumtute hremna chu kum 3-7 thleng lung-in tàn a ni a, October 2016 aṭanga September 2017 thlengin thubuai pariat siam a ni.

Sorkar laipuiin state tinte hnenah an state zau zawnga teh a, 10% ṭheuh ramsa humhalhna hmuna siam tura thupek a chhuah chu bawhzui a ni a, Mizoramah 8% tlin a ni ṭep tawh.

Wildlife Sanctuary bul hnaia awmte sawn chhuahna scheme, Village Reallocation Scheme hmangin Thorang khaw chhevela in 61 sawn chhuah tur zinga 55 chu sawn chhuah a ni tawh a; sawn chhuah chhungkuate chu chhungkaw pakhat Rs. 10,00,000 zel zangdadawmna pek a ni.