Dragon fruit enkawlna tur ṭanpuina sem

Horticulture minister PC Lalthanliana chuan, nimin khan Horticulture directorate conference hall-ah Aizawl district-a dragon fruit chíngtu chhung­kaw 73 hnenah ṭanpuina Rs. 8,750 ṭheuh a sem.

Ṭanpuina hi Indian Constitution Article 275(1) hnuaia tribal-te dâwm kânna tura ṭanpuina, Ministry of Tribal Affairs kaltlanga Mizoram sorkarin a hmuh a ni a, Horticulture department-in dragon fruit chíngtute chhawmdawl nan a rua­hman a ni.

Horticulture Minister chuan, Mizoram chu India rama dragon fruit uar hmasa ber a nih thu sawiin, "India ram khawi hmunah mah dragon fruit hi chìn tak tak a la nih loh avangin mi pawhin an hlut a, Mizoram hi India rama dragon fruit uar hmasa ber state kan ni," a ti.

PC Lalthanliana chuan, "Tu emaw nursery va duhsak emaw, duhsak loh emaw lam ni loin, planting material ṭha neih kan ngai pawimawh," a ti a; Horticulture department-in kut hnathawktute tan thlai/thei enkawlna hmanraw (planting material) ṭha a ngaih pawimawh thu leh, department-in thlai/thei hralhna tur (market) thlengin mawh an phur ang, tiin sorkar hotute'n an rel tawh thu a sawi.

Mizote'n a thlawna sum dawn theihna leh sum leh pai a ken tel vanga thlai/thei an tuipui chawp ṭhin chu a ṭha lo tih sawiin PC Lalthan­liana chuan, "Sum a awm vanga lo tuipui ngawt hi kan hlawhchhamna bul a ni. Sum leh pai a awm vanga tuipui chawp mai zel hi kan bânsan a ngai. Farmer-te kutah hlawh­tlinna a innghat," a ti.

Dragon fruit hi kum 2013 khan Aizawl district-ah enchhinna atan chìn ṭan a ni a, Mizoram leilung, sik leh sa a ngeih tih hmuh a nih avangin kum 2015-16 ah Horticulture department chuan beihpui thlakin hma a la a ni.

Nimina ṭanpuina sem dawngtute hian ram, buh ṭin khat hmunah dragon fruit kûng 600 an chíng a, an mamawh tur thil chi hrang hrang - Neem Kasto leiṭha, NPK leiṭha, pruning secateur, sprayer, plastic crate leh dragon fruit zàmna ban phunna tur ṭanpuina sum an dawng dawn a ni.