Serchhip district-a hnathawhte thlir lêt

Serchhip District Development Coordination Committee chu nimin khan chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhu­-

khawm a; Serchhip district chhunga hmasawnna hna thawh hrang hrangte an thlir lêt.

CL Ruala chuan DDCMC ṭhutkhawm hun an neih tlai chhan sawifiahin, "A hun atana sorkar laipuiin a ruat leh Parliament session a inrual vang te, President leh Vice President thlannate'n an nanchin zel vang­te a ni a, meeting vawi khatna leh vawi hnihna kawp a ngaih phah a ni. Mizoram hi DDCMC hmalaknaa India rama a ti ṭha berte zinga mi kan ni," a ti.

Ronald Sapa Tlau chuan, department hrang hrang hotute leh tlawmngai pawl hruaitute kutah district hmasawnna hnathawh a innghat tih sawiin, "He dinhmuna ding mek zawng zawngte, in hun ṭha neih hi thil ṭha, ṭangkai leh hriatreng tlak thawh nana hmang turin ka ngen che u," a ti a; member-te'n an thawh ṭhat phawt chuan an district-in hma a sawn tur thu a sawi.

Meeting-a tarlan danin, IWMP Project hrang hrang kalpui mekah kumin atan Project-II hnuaia mamawh fund chauh hmuh a nih dawn avang­in Project-III a hna kal lai mek leh Project-II ah chauh hna thawh theih a ni dawn. Project dangte chu fund hmuh dan azir zelin tihnun zui tur a ni.

BADP sum, kum 2016-17 chhunga hmuh cheng nuai 217 chu hman zawh tawh a ni a, kum 2017-18 ah chutiang zat vel chu hmuh tura beisei a ni. BADP sum hman dan turah hian Central-in hmalak hmasakna tur indawt (priority list) thar a nei a, an ngaih pawimawh dan indawt chu ramri aṭanga an hlat zawng aṭanga teh tur a ni.

Mirethei in saksakna, PMAY-(G) hnuaiah Serchhip Block-ah target 36 leh East Lungdar Block-ah target 19 a awm mek a, tun dinhmunah dum hmuh la ni lo mah se, hmuh thuai beisei a ni.

Kum 2017 chhungin primary school naupang 1,900 leh middle school naupang 3,278 hnenah a thlawnin zirlaibu pek a ni a, sikul uniform pawh P/S leh M/S naupang 4,067 hnenah pek a ni. Teacher grant chu zirtirtu mi 597 hnenah pek a ni a, chet phunga harsatna neite tan sikul 33-ah inthiarna sak zawh a ni bawk.

National Rural Drinking Water Programme hnuaiah Khawlailung khaw tuilakna thawh zawh tawh niin, hawn mai theiha peih a ni tawh a; Swachh Bharat (Gramin) hnuai­ah Solid Liquid Waste Management hmalaknain khaw 12-ah bawlhhlawh paihna hmun siam hna thawh tur a ni.