Europe-a zin dan sawifiah an phût Zodintluanga'n a sawifiah nghal
MNF ṭhalaite chuan thuchhuah siamin, UDPA minister Zodintluanga leh UDPA official dang pathumte'n tun hnaiah UDPA department sum hmangin Europe khawmualpuia ram ṭhenkhat an tlawh kual niin an tarlang a, an zin chhan emaw, ram tana thil ṭha an rawn hawn emaw sawifiah turin an phût.
MNYF tarlan danin, UDPA Minister hoa Europe-a zinte hi UDPA secretary Dr C Vanlalramsanga, joint secretary Vanlalmawia leh under secretary Lalmuansanga Ralte te an ni a, August 20, 2017-ah Lengpui chhuahsanin Amsterdam, Netherlands an pan a ni. Europe ram ṭhenkhat an tlawh kual a, UDPA sum cheng nuai 15.7 an hmang nia an hriat thu an tarlang.
Minister Zodintluanga chuan Europe lama an zin dan hi a sawifiah nghal a; Mizoram sorkarin AMRUT hnuaiah kum 2015-16 chhunga a thawh ṭhat avangin reform incentive cheng nuai 163 an dawng a, state 11 velin incentive an dawng a, kum 2016-17 ah pawh a thawh ṭhat avangin Mizoramin incentive cheng nuai 180 dawngin, state pasarihin an dawng tih a sawi.
Zodintluanga chuan, Mizoram sorkarin Ministry of Urban Development aṭanga reform incentive a dawn aṭanga 10% chu exposure visit atan hman a phal angin, UDPA department chuan exposure visit atan cheng nuai 34.3 a nei tih a sawi a, "Kan zinnaah hian Mizoram sorkar sum hman a ni lo a, UDPA department-in lawmman a dawn aṭang liau liau a ni. First batch-ah minister leh official pathum Europe lamah exposure visit-in kan kal a, batch dang pawh la kal zel thei tura ruahman a ni," a ti.