KHAWTHLIR

Pisa luah tan
Political adviser to chief minister Lalrinmawia Ralte, MLA chuan nimin khan Chief Minister's Office (CMO)-a a pisa a luah ṭan. Pisa luah ṭannaah hian Assembly deputy speaker R Lalrinawma chuan, CM Adviser atana MLA hman chu The Mizoram State Legislative Members(Removal of Disqualification) (Ammendment) Act, 2006 hmangin Office of Profit-in a huam lo niin a sawi a, "MLA ni chunga luah theih thlap a ni a, sawi buai theih a ni lo," a ti.

Tuirivâng humhalh
Phulpui Branch YMA chuan thuchhuah siamin, an khaw rama Tuirivâng lui chu an humhalh mek a nih thu an tarlang a, "October 5, 2017 aṭang hian Tuirivang lui dunga nungchate eng hmanrua hmang mahin man phal a ni lo," an ti. Dan pawisa loa Tuirivang luia nungcha man luite chu an chungthu an relsak nghal dawn thu an sawi a; man ngaia awm lo tur leh humhalhpui ṭheuh turin mi tin an ngen a ni.

Director thar
Mizoram sorkar chuan Social Welfare department director atan joint director ni lai Laldikkimi a dah. Hemi chungchanga hriattirna hi nimin khan Social Welfare secretary V Lalremthanga'n a tichhuak a ni.

Award dawng
October 2, 2017 khan Swacch Bharat Mission hnuaia inelna hrang hranga tiṭhate hnenah Vigyan Bhavan, Delhi-ah lawmmah sem a ni a, Mamit district chuan êk-in siam tam lawmman, Maximum Increase in Toilet Coverage an dawng.

Painting Exhibition
Information & Public Relations department leh Mizoram Art Development Society (MADS) ṭangkawp bul tuma V Laltlanmawia'n Novelty Art Gallery, Chaltlanga ‘1st. Solo Painting Exhibition’ an buatsaih chu nimin khan IPR director Lalnithangi'n a hawng. Exhibition hian October 7 thleng a awh dawn a, lemziak 37 pho chhuah a ni.