Assam-in Zophaia an bûk sak an ṭhiat ; Mizo ṭhalaite Mizoram police-in an dang
Assam mite chuan Bairabi Zophaia Ch Chhunga leiletah October 1-2, 2022 khan mau hmangin bûk (temporary shelter) an sa a, pawl hrang hrang leh Bairabi mipuite'n ṭhiat turin Mizoram sorkar an nawr laiin, nimin khan Assam mite vêkin an ṭhiat. October 2, Pathianni zana ṭhiah tumtu MZP Gen.Hqrs hruaitute leh Bairabi-a tlawmngai pawlte chu Mizoram police-te'n an dang.
Thu dawn danin, Zophaia bûk sa tur hian Assam lam chuan kumin September thla tàwp lam khan hma an la ṭan tawh a, Bairabi NGO hruaitute'n sorkar thuneitute hnenah an thlen nghal. Mizoram sorkar aṭangin hmalakna a awm mai lo a, Assam mite chuan October 1 khan sa
ṭanin, October 2 khan an sa zo a ni. Assam police-te'n an véng nghal bawk.
Zophaia bûk sak chu Bairabi khawtlang hruaitute chuan duh loin, October 2 zan khan ṭhiah an tum a, Mizoram police-in an dan avangin an ṭhiat thei lo. Hun eng emaw chen an indan hnuah inremna siam a ni. Nimin chhun dar 12 hmaa Mizoram hmalakna an hmuh loh chuan MZP-in a ṭul
anga hmalak an tum.
Hetih lai hian, nimin chhun dar 11 vel khan Assam mite chuan an bûk sak chu an ṭhiat a, chhun dar 11:30 velah ṭhiat zoin, bungruate an senghawi nghal vek a ni. Vanglaini palai zawhna chhangin Bairabi MZP hruaitute chuan, Mizoram police-in an dan chhan an sawi a, "Ramri chhak tlang velah Assam police an awm vek a, in kal chuan an kâp ang che u, tiin kal an remti lo," an ti.
Bûk ṭhiah a nih hmain Bairabi North VC House-ah Bairabi Joint VC chairman Lalrinawma kaihhruaiin ṭhutkhawm a ni a; bialtu MLA K Lalrinliana, minister of state chuan, ramri chungchanga Mizoram sorkar dinna chu BERF, 1875 a la nih reng thu a sawi. K Lalrinliana chuan, Assam leh
Mizoram ramri buai awm chu thil kal mek a nih avangin hmalakna mipui hriata sawi vek chi loh tam tak a awm thu a sawi a, "Mizoram sorkarin ramri buai avangin Mizo ṭhalaite vuak tuartir a tum vek lo. An hmaah kan ding zel dawn," a ti.
Kolasib SP Vanlalfaka Ralte leh district forest offi cer Margareth Lalramchhani sawi danin, Zophaia bûk sak chu Hailakandi SP leh Hailakandi DFO ten an hriatpui loh thu an sawi. Zampuimanga Group YMA president C Lalbiakenga chuan, ramri-ah boruak dang a awm chángin Mizoram sorkar leh department-te an che muang ṭhin chu a vei thu sawiin, "Tun ṭuma Assam lamin hmalakna an neih chungchangah pawh sorkar a chêt muan vangin Mizo leh Mizo inkarah harsatna dang a awm hman ṭêp a ni," a ti.
Bûk sakna hmuna kal Kolasib SP chu Katlichera OC Santanu Das chuan hmalakna thar awm chu Assam police-in an hriatpui loh thu leh Guwahati lama awm, commando-te training-na hmun tur nia a hriat thu a lo hrilh a ni.